ប្រជុំពិភាក្សាលើកិច្ចសហប្រតិបត្តិការក្នុងក្របខណ្ឌនៃការស្រាវជ្រាវកម្មវិធីបណ្ដុះបណ្ដាល និងជំនួយបច្ចេកទេស ដើម្បីលើកកម្ពស់ការពង្រីកបច្ចេកវិទ្យាដែលមិនប៉ះពាល់ដល់បរិស្ថាន ទីស្តីការក្រសួង៖នាថ្ងៃទី២៨ ខែឧសភា ឆ្នាំ២០២៦ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថាន និងសហការី បានជួបប្រជុំពិភាក្សា(Online Meeting) ការងារជាមួយក្រុមការងារក្រុមហ៊ុន N-GENIUS CO., LTD លើកិច្ចសហប្រតិបត្តិការក្នុងក្របខណ្ឌនៃការស្រាវជ្រាវ កម្មវិធីបណ្ដុះបណ្ដាល និងជំនួយបច្ចេកទេស ដើម្បីលើកកម្ពស់ការពង្រីកបច្ចេកវិទ្យាដែលមិនប៉ះពាល់ដល់បរិស្ថាន។ ក្នុងជំនួបនេះដែរបានពិភាក្សាលើការងារពាក់ព័ន្ធមួយចំនួនដូចខាងក្រោម៖ ១. រំលឹកឡើងវិញនូវសាវតារនៃការចុះអនុស្សរណៈនៃការយោគយល់គ្នា (MoU) រវាងវិទ្យាស្ថាន និងក្រុមហ៊ុន N-GENIUS។ ២. វាយតម្លៃ លើលទ្ធផលការងារដែលបានសហការអនុវត្តរួមគ្នានាពេលកន្លងមក។ ៣. ធ្វើបច្ចុប្បន្នភាព លើវឌ្ឍនភាពការងារ ដើម្បីសិក្សាពីតម្រូវការរបស់ភាគីទាំងសងខាង ក៏ដូចជាស្វែងរកដំណោះស្រាយចំពោះបញ្ហារាំងស្ទះនានា សំដៅធានាឱ្យបាននូវនិរន្តរភាព និងភាពរលូនក្នុងការអនុវត្តកិច្ចសហប្រតិបត្តិការនេះ។ លទ្ធផលទទួលបានក្រោយកិច្ចពិភាក្សា៖ - ក្រុមហ៊ុន N-GENIUS៖ នឹងរៀបចំផ្តល់សម្ភារសម្រាប់ពង្រឹងគុណភាពដី (N-Soil) ព្រមទាំងឧបករណ៍ និងជំនួយបច្ចេកទេសមួយចំនួនមកកាន់វិទ្យាស្ថាន ដើម្បីបន្តការងារពិសោធន៍នៅក្នុងមន្ទីរពិសោធន៍ និងឈានទៅអនុវត្តការពិសោធន៍ផ្ទាល់នៅការដ្ឋាន (Test Bed)។ - វិទ្យាស្ថាន នឹងរៀបចំក្រុមការងារដើម្បីបន្តអនុវត្តការងារពិសោធន៍ ព្រមទាំងរៀបចំនីតិវិធីផ្សេងៗ ដើម្បីសម្រេចឱ្យបាននូវការអនុវត្តនៅការដ្ឋានផ្ទាល់ ឱ្យស្របទៅនឹងគោលបំណង និងទិសដៅនៃកិច្ចសហប្រតិបត្តិការ។ - ការផ្លាស់ប្តូរបទពិសោធន៍ ក្រុមហ៊ុន N-GENIUS នឹងសិក្សាពីលទ្ធភាពក្នុងការមកទស្សនកិច្ច និងចូលរួមពិសោធន៍ផ្ទាល់នៅវិទ្យាស្ថាន ព្រមទាំងសិក្សាពីលទ្ធភាពអញ្ជើញក្រុមការងាររបស់វិទ្យាស្ថាន ទៅធ្វើទស្សនកិច្ចសិក្សានៅសាធារណរដ្ឋកូរ៉េ ដើម្បីផ្លាស់ប្តូរបទពិសោធន៍ជម្រុញកិច្ចសហប្រតិបត្តិការ។ សូមជម្រាបផងដែរថា វិទ្យាស្ថានតេជោសែន សាធារណការ និងដឹកជញ្ជូន បានចុះអនុស្សរណៈនៃការយោគយល់ (MoU) ជាមួយក្រុមហ៊ុន N-GENIUS CO., LTD. នៃសាធារណរដ្ឋកូរ៉េលើកិច្ចសហប្រតិបត្តិការលើក្របខ័ណ្ឌនៃការស្រាវជ្រាវ កម្មវិធីបណ្តុះបណ្តាល និងជំនួយបច្ចេកទេស កាលពីថ្ងៃទី១០ ខែកុម្ភៈ ឆ្នាំ២០២៥៕