វគ្គបណ្តុះបណ្តាល និងផ្សព្វផ្សាយស្តីពីការប្រើប្រាស់ប្រព័ន្ធគ្រប់គ្រងឯកសារបច្ចេកទេស របស់អគ្គនាយកដ្ឋានបច្ចេកទេស ទីស្តីការក្រសួង៖ នាថ្ងៃសុក្រ ទី១៧ ខែកក្កដា ឆ្នាំ២០២៦ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស បានអញ្ជើញជាអធិបតីក្នុងពិធីបើកវគ្គបណ្តុះបណ្តាល និងផ្សព្វផ្សាយស្តីពីការប្រើប្រាស់ប្រព័ន្ធគ្រប់គ្រងឯកសារបច្ចេកទេស (Technical Document Management System – TDMS) រៀបចំដោយអគ្គនាយកដ្ឋានបច្ចេកទេស ដោយមានការចូលរួមពីលោកប្រធាននាយកដ្ឋានផ្លូវថ្នល់ លោកអនុប្រធាននាយកដ្ឋាន និងមន្ត្រីបច្ចេកទេសពាក់ព័ន្ធនៃអគ្គនាយកដ្ឋាន និងអង្គភាពក្រោមឱវាទក្រសួងសាធារណការ និងដឹកជញ្ជូន។ វគ្គបណ្តុះបណ្តាល និងផ្សព្វផ្សាយស្តីពីការប្រើប្រាស់ប្រព័ន្ធគ្រប់គ្រងឯកសារបច្ចេកទេស (TDMS) នេះ រៀបចំឡើងក្នុងគោលបំណងផ្សព្វផ្សាយ និងជំរុញការប្រើប្រាស់ប្រព័ន្ធឌីជីថលសម្រាប់ការគ្រប់គ្រង ផ្ទុក ស្វែងរក និងចែករំលែកឯកសារបច្ចេកទេស និងឯកសារគម្រោងពាក់ព័ន្ធនឹងការងារហេដ្ឋារចនាសម្ព័ន្ធផ្លូវថ្នល់ ប្រកបដោយប្រសិទ្ធភាព សុវត្ថិភាព និងភាពងាយស្រួលក្នុងការចូលប្រើប្រាស់តាមប្រព័ន្ធអនឡាញ។ ថ្លែងក្នុងឱកាសនោះ ឯកឧត្តមអគ្គនាយក ក៏បានស្នើឱ្យមន្ត្រីជំនាញគ្រប់អង្គភាព បន្តគាំទ្រ និងជំរុញការប្រើប្រាស់ប្រព័ន្ធ TDMS ឱ្យមានប្រសិទ្ធភាព ដោយចាត់ទុកការគ្រប់គ្រងទិន្នន័យ និងឯកសារបច្ចេកទេសជាទ្រព្យសម្បត្តិស្ថាប័នដែលត្រូវថែរក្សា អភិវឌ្ឍ និងចែករំលែកប្រកបដោយទំនួលខុសត្រូវ។ ទន្ទឹមនឹងនេះ មន្ត្រីបង្គោលត្រូវអនុវត្តចំណេះដឹងដែលទទួលបានពីវគ្គបណ្តុះបណ្តាលក្នុងការងារជាក់ស្តែង និងបន្តផ្សព្វផ្សាយដល់មន្ត្រីក្នុងអង្គភាពរបស់ខ្លួន ព្រមទាំងផ្ដល់នូវធាតុចូល និងមតិយោបល់បន្ថែមសម្រាប់កែលម្អ និងអភិវឌ្ឍប្រព័ន្ធឱ្យកាន់តែមានប្រសិទ្ធភាពឆ្លើយតបទៅនឹងតម្រូវការប្រើប្រាស់ជាក់ស្តែង ដើម្បីធានាបានការប្រើប្រាស់ប្រព័ន្ធប្រកបដោយនិរន្តរភាព។ សូមជម្រាបផងដែរថា ប្រព័ន្ធគ្រប់គ្រងឯកសារបច្ចេកទេស TDMS បានដាក់ឱ្យប្រើប្រាស់កាលពីខែតុលា ឆ្នាំ២០២៣ កន្លងទៅ ដើម្បីគាំទ្រដល់ការគ្រប់គ្រងឯកសារបច្ចេកទេសរបស់អគ្គនាយកដ្ឋានបច្ចេកទេស ហើយការដាក់ឱ្យប្រើប្រាស់ប្រព័ន្ធ TDMS ដល់អគ្គនាយកដ្ឋាន និងអង្គភាពពាក់ព័ន្ធក្រសួងនៅពេលនេះ ត្រូវបានរំពឹងថានឹងក្លាយជាមូលដ្ឋានទិន្នន័យបច្ចេកទេសដ៏សំខាន់របស់ក្រសួងសាធារណការ និងដឹកជញ្ជូន ដែលរួមចំណែកពង្រឹងការគ្រប់គ្រងឯកសារបច្ចេកទេស និងការចែករំលែកព័ត៌មាន៕