សិក្ខាសាលាផ្សព្វផ្សាយ និងបណ្តុះបណ្តាលស្តីពី ការធ្វើបច្ចុប្បន្នភាពអំពីបែបបទ នីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យសាធារណការ និងដឹកជញ្ជូន ដល់មន្រ្តីអនុវត្តមុខងារនៅរដ្ឋបាលថ្នាក់ក្រោមជាតិ កំពង់ស្ពឺ៖ នាថ្ងៃព្រហស្បតិ៍-សុក្រ ទី១៦-១៧ ខែកក្កដា ឆ្នាំ២០២៦ ឯកឧត្តម សួន រចនា រដ្ឋលេខាធិការ និងជាអនុប្រធានប្រចាំការគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្រ្តី និងជាប្រធានគណៈកម្មការដឹកនាំកំណែទម្រង់វិមជ្ឈការ និងវិសហមជ្ឈការ បានចូលរួមជាអធិបតីពិធីបើក «សិក្ខាសាលាផ្សព្វផ្សាយ និងបណ្តុះបណ្តាលស្តីពីការធ្វើបច្ចុប្បន្នភាពអំពីបែបបទ នីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យសាធារណការ និងដឹកជញ្ជូន ដល់មន្រ្តីអនុវត្តមុខងារនៅរដ្ឋបាលថ្នាក់ក្រោមជាតិ»។ កម្មវិធីសិក្ខាសាលាផ្សព្វផ្សាយ និងបណ្តុះបណ្តាលត្រូវបានផ្តល់កិត្តិយសអញ្ជើញធ្វើជាវាគ្មិនពី ឯកឧត្តម នឹម សុធា អនុរដ្ឋលេខាធិការ ក្រុមការងារតំណាងអគ្គនាយកដ្ឋានដឹកជញ្ជូនផ្លូវគោក ក្រុមការងារតំណាងអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពងផែ ធ្វើបទបង្ហាញលើប្រធានបទសំខាន់ៗមាន៖ ១).ការផ្សព្វផ្សាយច្បាប់ស្តីពីការដឹកជញ្ជូនតាមផ្លូវទឹក និងអត្ថប្រយោជន៍នៃការដឹកជញ្ជូនតាមផ្លូវទឹក និងចុះបញ្ជីនាវានៅអង្គភាពច្រកចេញចូលតែមួយ ២).ចុះបញ្ជីនាវានៅអង្គភាពច្រកចេញចូលតែមួយ និងការិយាល័យច្រកចេញចូលតែមួយក្រុង ស្រុក) ៣).វឌ្ឍនភាព និងស្ថានភាពនៃការប្រើប្រាស់ប្រព័ន្ធស្វ័យប្រវត្តិកម្មពីរនៅតាមច្រកផ្តល់សេវា និងបណ្ណបើកបរទម្រង់ឌីជីថល ៤).ការចុះបញ្ជីយានយន្ត ប្តូរទុតិយតា តតិយតាបណ្ណសម្គាល់ និងផ្លាកលេខសម្គាល់យានយន្ត និង៥). ការត្រួតពិនិត្យលក្ខណៈបច្ចេកទេសត្រីចក្រយានយន្ត និងទោចក្រយានយន្តសណ្តោងរ៉ឺម៉ក។ សិក្ខាកាមអញ្ជើញឱ្យចូលរួមមានប្រធានអង្គភាពច្រកចេញចូលតែមួយ អភិបាលរងក្រុង ស្រុក ប្រធានការិយាល័យច្រកចេញចូលតែមួយ មន្រីអនុវត្តមុខងា និងប្រធាន អនុប្រធានមន្ទីរសាធារសាធារណការ និងដឹកជញ្ជូន មកពីរដ្ឋបាលរាជធានីភ្នំពេញ ខេត្តកំពង់ស្ពឺ តាកែវ កែប កំពត ព្រះសីហនុ កណ្តាល និងរដ្ឋបាលខេត្តកោះកុង និងការិយាល័យច្រកចេញចូលតែមួយនៃរដ្ឋបាលក្រុង ស្រុក ខណ្ឌ ចំនួ៧០ និងសិក្ខាកាមសរុបមានចំនួន២៨៣ នាក់ ស្រី៣៥នាក់។ សិក្ខាសាលារៀបចំឡើងក្នុងគោលបំណងបណ្តុះបណ្តាល ផ្សព្វផ្សាយ និងពង្រឹងសមត្ថភាពបន្ថែមទៀត ដើម្បីគាំទ្រផ្នែកបច្ចេកទេសដល់មន្រ្តីអនុវត្តមុខងារដែលបានផ្ទេរមុខងារទៅថ្នាក់ក្រោមជាតិ ក្នុងការលើកកម្ពស់សមត្ថភាពការផ្តល់សេវាសាធារណៈក្នុងវិស័យសាធារណការ និងដឹកជញ្ជូន នៅអង្គភាពច្រកចេញចូលតែមួយខេត្ត និងការិយាល័យច្រកចេញចូលតែមួយក្រុង ស្រុក ដើម្បីផ្តល់សេវាជូនប្រជាពលរដ្ឋប្រកបដោយប្រសិទ្ធភាព គុណភាព គណនយ្យភាព និងតម្លាភាព។ ជាពិសេសការផ្សព្វផ្សាយ និងការធ្វើបច្ចុប្បន្នភាពបទដ្ឋានគតិយុត្ត ការផ្លាស់ប្តូរបទពិសោធន៍ ចំណេះដឹង និងការដោះស្រាយបញ្ហាប្រឈមនានា។ ឯកឧត្តមរដ្ឋលេខាធិការបានផ្តល់អនុសាសន័មួយចំនួនជូនអង្គសិក្ខាសាលា ដើម្បីជាមូលដ្ឋានជំរុញល្បឿនការងារឱ្យកាន់តែមានប្រសិទ្ធភាព និងឆ្លើយតបបានទៅនឹងស្ថានភាពបច្ចុប្បន្ន ៖ ១/.ពង្រឹងការយល់ដឹងបន្ថែមអំពីបែបបទ និងនីតិវិធីថ្មីៗ ជាពិសេសមន្ត្រីអនុវត្តមុខងារថ្មី ត្រូវសិក្សា ស្វែងយល់បន្ថែម និងអនុវត្តតាមគោលការណ៍ បែបបទ និងនីតិវិធីដែលបានធ្វើបច្ចុប្បន្នភាពឱ្យបានត្រឹមត្រូវ និងមានប្រសិទ្ធភាព។ ២/.ការបង្កើនប្រសិទ្ធភាព គុណភាពបន្ថែមនៃការផ្តល់សេវារដ្ឋបាល ត្រូវផ្តល់សេវាជូនប្រជាពលរដ្ឋដោយភាពរហ័ស តម្លាភាព ទំនួលខុសត្រូវ និងគោរពតាមក្រមសីលធម៌វិជ្ជាជីវៈ និងច្បាប់។ ៣/.បន្តជំរុញការប្រើប្រាស់ប្រព័ន្ធបច្ចេកវិទ្យាឌីជីថល លើកទឹកចិត្តដល់មន្ត្រី ក្នុងការសិក្សាស្វែងយល់បន្ថែមការប្រើប្រាស់ប្រព័ន្ធឌីជីថល អេឡិចត្រូនិក ដើម្បីបង្កើនប្រសិទ្ធភាព និងកាត់បន្ថយពេលវេលាផ្តល់សេវាជូនប្រជាពលរដ្ឋមូលដ្ឋាន។ ៤/.ផ្តោតលើការបម្រើប្រជាពលរដ្ឋជាមជ្ឈមណ្ឌល ការផ្តល់សេវាត្រូវផ្អែកលើតម្រូវការ និងផលប្រយោជន៍របស់ប្រជាពលរដ្ឋ ដោយធានាភាពងាយស្រួល និងទំនុកចិត្តលើសេវាសាធារណៈ៕