កិច្ចប្រជុំផ្ទៃក្នុង ពិនិត្យ និងធ្វើបច្ចុប្បន្នភាពលើសេចក្ដីព្រាងច្បាប់ស្ដីពី "ភស្តុភារកម្ម" ទីស្ដីការក្រសួង៖ នាថ្ងៃសុក្រ ទី១៧ ខែកក្កដា ឆ្នាំ២០២៦ ឯកឧត្ដម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាផ្ទៃក្នុង ដើម្បីពិនិត្យ និងពិភាក្សាលើសេចក្ដីព្រាងច្បាប់ស្ដីពី "ភស្តុភារកម្ម" ដោយមានការអញ្ជើញចូលរួមពីថ្នាក់ដឹកនាំ ឯកឧត្តម-លោកជំទាវអនុរដ្ឋលេខាធិការ លោកជំទាវអគ្គនាយក ទីប្រឹក្សាច្បាប់ និងមន្រ្តីជំនាញនៃអគ្គនាយកដ្ឋានភស្តុភារកម្មជាច្រើនរូប។ កិច្ចប្រជុំនេះ ធ្វើឡើងក្នុងគោលបំណងដើម្បីពិភាក្សា និងពិនិត្យកម្រងមតិយោបល់ និងធាតុចូលពីបណ្ដាក្រសួង ស្ថាប័ន និងដៃគូអភិវឌ្ឍន៍ វិស័យឯកជន តាមរយៈកិច្ចប្រជុំគណៈកម្មាធិការជាតិភស្តុភារកម្ម ១លើក និងកិច្ចប្រជុំក្រុមប្រឹក្សាជាតិភស្តុភារកម្ម ២លើក កន្លងទៅ ជាមូលដ្ឋានសម្រាប់ការធ្វើបច្ចុប្បន្នភាពលើខ្លឹមសារនៃសេចក្ដីព្រាងច្បាប់ស្ដីពី "ភស្តុភារកម្ម" ឱ្យបានគ្រប់ជ្រុងជ្រោយ មុននឹងអនុវត្តនីតិវិធីបន្ទាប់ ដែលគ្រោងនឹងដាក់ឆ្លងក្រុមប្រឹក្សាអ្នកច្បាប់នៃទីស្ដីការគណៈរដ្ឋមន្រ្តី នាពេលឆាប់ៗខាងមុខនេះ។ ឯកឧត្ដមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ក្រុមការងាររៀបចំច្បាប់សេចក្ដីព្រាងស្ដីពី "ភស្តុភារកម្ម" ដោយទទួលបានផ្លែផ្កាជាច្រើន លើសពីនេះ ឯកឧត្ដម បានផ្ដល់អនុសាសន៍ណែនាំឱ្យក្រុមការងារពន្លឿនការធ្វើបច្ចុប្បន្នភាពសេចក្ដីព្រាងច្បាប់ស្ដីពី "ភស្តុភារកម្ម" និងរៀបចំឯកសារពាក់ព័ន្ធសម្រាប់បំពេញនីតិវិធីរបស់ទីស្ដីការគណៈរដ្ឋមន្រ្តី ផងដែរ៕