[Post khmer] - Grab កំពុងរៀបចំខ្លួនចូលទីផ្សារកម្ពុជា
2017-09-29
ទៅកាន់ទំព័រចុះផ្សាយក្នុង Post khmer
ភ្នំពេញៈ Grab ដែលជាកម្មវិធីហៅរថយន្តតាក់ស៊ីជិះធំជាងគេនៅតំបន់អាស៊ីអាគ្នេយ៍ ទំនងជានឹងដាក់ដំណើរការប្រតិបត្តិការនៅកម្ពុជា ជាទីដែលកម្មវិធីនេះ អាចប្រឈមនឹងការប្រកួតប្រជែងខ្លាំងពីក្រុមហ៊ុនអន្តរជាតិ Uber និងកម្មវិធីហៅរថយន្តតាក់ស៊ីក្នុងស្រុកមួយចំនួនដែលត្រូវបានបង្កើតរួចមកហើយ។
ក្រុមហ៊ុនបច្ចេកវិទ្យាដែលមានមូលដ្ឋាននៅក្នុងប្រទេសសិង្ហបុរីមួយនេះ បានរៀបចំព្រឹត្តិការណ៍ ជ្រើសរើសអ្នកបើកបរនៅទីក្រុងភ្នំពេញនៅសប្តាហ៍នេះ និងបានចុះឈ្មោះប្រទេសកម្ពុជានៅលើគេហទំព័រសហប្រតិបត្តិការរបស់ខ្លួនក្នុងនាមជាប្រទេសមួយក្នុងចំណោមប្រទេសចំនួន៨ ដែលក្រុមហ៊ុនបានដាក់ដំណើរការប្រតិបត្តិការ។
នាពេលថ្មីៗនេះ ក្រុមហ៊ុន Grab ក៏បានធ្វើបច្ចុប្បន្នភាពកម្មវិធីទូរស័ព្ទទំនើបរបស់ខ្លួនផងដែរដើម្បីដាក់បញ្ចូលទីតាំងរាប់រយកន្លែង នៅទូទាំងរាជធានីភ្នំពេញ ទន្ទឹមនឹងនោះដែរ រូបភាព ដែលបានថតកាលពីដើមសប្តាហ៍នេះ និងបានបង្ហោះនៅលើប្រព័ន្ធអ៊ីនធឺណិត បានបង្ហាញពីទីតាំងរបស់អ្នកបើកបររថយន្តសកម្មជិត ១២ នាក់នៅលើផែនទីក្រុងភ្នំពេញ។
ក្រៅពីសូចនាករទាំងនេះ អ្នកនាំពាក្យរបស់ក្រុមហ៊ុន Grab បានបញ្ជាក់តាមរយៈអ៊ីម៉ែលមួយ នៅសប្តាហ៍នេះថា កម្មវិធីហៅរថយន្តតាក់ស៊ីរបស់ក្រុមហ៊ុននេះ នៅមិនទាន់ដាក់ឲ្យប្រើប្រាស់នៅកម្ពុជានៅឡើយទេ។
លោក Nattianan Vanichchanant ប្រធានផ្នែកទំនាក់ទំនង ប្រចាំក្រុមហ៊ុន Grab មានប្រសាសន៍ថា ៖ «ក្រុមហ៊ុន Grab នៅមិនទាន់បានដាក់ដំណើរការនៅកម្ពុជានៅឡើយទេ ដោយសារយើងនៅតែកំពុងសិក្សាពីទីផ្សារនេះ ហើយស្នើសុំយោបល់ពីក្រសួងសាធារណការ និងដឹកជញ្ជូនអំពីច្បាប់ក្នុងស្រុក និងលក្ខខណ្ឌតម្រូវផ្នែកច្បាប់»។
កាលពីថ្ងៃចន្ទ ក្នុងសប្តាហ៍នេះប្រធានប្រចាំប្រទេសថៃរបស់ក្រុមហ៊ុន Grab លោក Yee Wee Tang បានជួបពិភាក្សាជាមួយនឹងរដ្ឋមន្ត្រីក្រសួងគមនាគមន៍លោក ស៊ុន ចាន់ថុល ដើម្បីពិភាក្សាពីនីតិវិធីដើម្បីទទួលបានអាជ្ញាប័ណ្ណ។ នេះបើយោងតាមសារដែលបានបង្ហោះនៅលើគេហទំព័រសង្គម Facebook របស់ក្រសួងសាធារណការ និងដឹកជញ្ជូន (MPWT)។
ទន្ទឹមនឹងនោះដែរ រដ្ឋមន្ត្រីរូបនេះ បានស្វាគមន៍ចំពោះការចូលមកដល់របស់ក្រុមហ៊ុន Grab ក្នុងទីផ្សារកម្ពុជា លោកបានស្នើឲ្យក្រុមហ៊ុនផ្តល់សេវាហៅរថយន្តតាក់ស៊ីនេះ «ប្រតិបត្តិការដោយគោរពយ៉ាងតឹងរ៉ឹងតាមច្បាប់របស់កម្ពុជា» និងបានជំរុញឲ្យក្រុមហ៊ុននេះ សហការជាមួយនឹងក្រសួងស្តីពីនីតិវិធីអាជ្ញាប័ណ្ណ។ នេះបើយោងតាមសារដែលបានបង្ហោះនៅលើបណ្តាញសង្គម Facebook របស់ក្រសួង។
ក្រុមហ៊ុន Grab នឹងប្រឈមនឹងការប្រកួតប្រជែងកាន់តែខ្លាំងនៅកម្ពុជា ដោយមិនត្រឹមតែត្រូវប្រជែង នឹងគូប្រជែងធំ Uber ដែលបានសាកល្បងកម្មវិធីហៅរថយន្តតាក់ស៊ីតាមទូរស័ព្ទទំនើបរបស់ខ្លួននៅ ភ្នំពេញកាលពីបីខែមុន និងបើកសម្ពោធផ្លូវការកាលពីម្សិលមិញប៉ុណ្ណោះទេ ថែមទាំងកម្មវិធីហៅរថយន្តតាក់ស៊ីក្នុងស្រុកមួយចំនួនទៀតផងដែរ ដូចជាកម្មវិធី Exnet Taxi Cambodia កម្មវិធី iTsumo និងកម្មវិធី PassApp ដែលមានច្រើនកុះកររួចទៅហើយនៅទីផ្សារប្រទេសកម្ពុជាជាមួយនឹងជម្រើសធ្វើដំណើរដែលមានតម្លៃថោក៕ BP
