បេក្ខជនជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សរបស់ប្រទេសជប៉ុន(JDS-2025) ចំនួន ២៤រូប ថ្នាក់អនុបណ្ឌិត និងថ្នាក់បណ្ឌិត ទទួលអនុសាសន៍ណែនាំល្អៗមុនពេលចេញដំណើរទៅបន្តការសិក្សា ទីស្ដីការក្រសួង៖ នារសៀលថ្ងៃអង្គារ ទី១៤ ខែកក្កដា ឆ្នាំ២០២៦ ឯកឧត្តម ឡាវ វ៉ាន់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាល ដើម្បីផ្តល់អនុសាសន៍ល្អៗជូននិស្សិតជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សរបស់រដ្ឋាភិបាលជប៉ុន (JDS-2025)(Japanese Grant Aid for Human Resource Development Scholarship- JDS) ចំនួន ២៤រូប ដែលជាមន្រ្តីរាជការមកពី ១៦ក្រសួង-ស្ថាប័ន មុនចេញដំណើរទៅសិក្សានៅប្រទេសជប៉ុន ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីពាក់ព័ន្ធជាច្រើនរូបផងដែរ។ ជាកិច្ចចាប់ផ្ដើម ឯកឧត្តមរដ្ឋលេខាធិការ ក្នុងនាមថ្នាក់ដឹកនាំក្រសួងសម្ដែងការអបអរសាទរ កោតសរសើរចំពោះនិស្សិតជ័យលាភី ព្រមទាំងពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ជំរុញលើកទឹកចិត្តឱ្យនិស្សិតយកចិត្តទុកដាក់ និងខិតខំប្រឹងប្រែងសិក្សារៀនសូត្រ និងស្វែងយល់ពីចំណេះដឹងសំដៅពង្រឹងសមត្ថភាពរបស់ខ្លួន ដើម្បីទទួលបាននូវលទ្ធផលដ៏ល្អប្រសើរក្នុងការអភិវឌ្ឍកសាងសង្គម-សេដ្ឋកិច្ចកម្ពុជា ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលអាណ្តិតទី៧ និងបង្កើនសក្តានុពលជំនាញជាមួយរាជរដ្ឋាភិបាល នៅពេលវិលត្រឡប់មកមាតុប្រទេសវិញ។ បន្ថែមពីនោះ ឯកឧត្តមរដ្ឋលេខាធិការ ក៏បានផ្តាំផ្ញើផងដែរសុំឱ្យបេក្ខជនជ័យលាភីទាំងអស់ត្រូវរក្សាអរិយធម៌ ប្រពៃណីជាតិ អាកប្បកិរិយាល្អ មានសាមគ្គីភាពរវាងនិស្សិតដែលទៅសិក្សារួមគ្នា និងគោរពវិន័យឱ្យបានម៉ឺងម៉ាត់ ជាពិសេសធ្វើខ្លួនជាទូតសុច្ឆន្ទៈសម្រាប់ប្រទេសកម្ពុជា ដើម្បីជួយផ្សព្វផ្សាយអំពីការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ក៏ដូចជាព័ត៌មានពិតអំពីការរីកចម្រើនរបស់ប្រទេសកម្ពុជាឱ្យពិភពលោកបានដឹងផងដែរ។ សូមជម្រាបថា និស្សិតជ័យលាភីអាហារូបករណ៍កម្មវិធីអភិវឌ្ឍន៍ធនធានមនុស្សរបស់រដ្ឋាភិបាលជប៉ុន (JDS-2025) សរុបចំនួន ២៤រូប ស្រី ១៤នាក់ ដែលត្រូវសិក្សាលើមុខជំនាញ ៩ រួមមាន ៖ ១). ទំនាក់ទំនងអន្តរជាតិ ២). អភិវឌ្ឍន៍ធនធានមនុស្ស ៣).អប់រំ ៤).បរិស្ថាន បម្រែបម្រួលអាកាសធាតុ និងអភិវឌ្ឍន៍កសិកម្ម ៥). សេដ្ឋកិច្ចឌីជីថល និងសង្គម ៦).ការពង្រឹងទំនាក់ទំនង ៧).ការកែលម្អមុខងាររដ្ឋបាល ៨). កសិកម្ម និងអភិវឌ្ឍន៍ជនបទ និង ៩). អភិវឌ្ឍន៍វិស័យឯកជន៕