កិច្ចប្រជុំដំបូងនៃគម្រោងធ្វើឱ្យប្រសើរឡើងហេដ្ឋារចនាសម្ព័ន្ធ និងសុវត្ថិភាពផ្លូវថ្នល់ឱ្យធន់នឹងទឹកជំនន់ ទីស្ដីការក្រសួង៖ នាថ្ងៃអង្គារ ទី១៤ ខែកក្កដា ឆ្នាំ២០២៦ ឯកឧត្តម ប៉ាល់ ចន្ទតារា រដ្ឋលេខាធិការ និងជានាយកគម្រោង បានអញ្ជើញដឹកនាំកិច្ចប្រជុំផ្ទៃក្នុងរបស់ក្រុមការងារគ្រប់គ្រងគម្រោងធ្វើឱ្យប្រសើរឡើងហេដ្ឋារចនាសម្ព័ន្ធ និងសុវត្ថិភាពផ្លូវថ្នល់ឱ្យធន់នឹងទឹកជំនន់ (Flood Resilience Road Upgrading and Safety Enhancement Project) ដែលជាគម្រោងក្រោមក្របខ័ណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដោយមានការចូលរួមពីសមាជិក សមាជិកាគម្រោងផងដែរ។ កិច្ចប្រជុំនេះរៀបចំឡើងក្នុងគោលបំណងប្រកាសសមាសភាពសមាជិកក្រុមការងារគម្រោង និងពិភាក្សាលើការងារស្នូល រួមមាន៖ ការរៀបចំលក្ខខណ្ឌយោង (TOR) ការងារបច្ចេកទេស ហិរញ្ញវត្ថុ លទ្ធកម្ម និងរដ្ឋបាលទូទៅ។ អង្គប្រជុំបានពិភាក្សាទៅលើការជំរុញ និងពន្លឿនវឌ្ឍនភាពការងារ ធ្វើយ៉ាងណាឱ្យគម្រោងនេះលេចរូបរាងឡើងក្នុងពេលឆាប់ៗ ក្នុងគោលដៅបម្រើផលប្រយោជន៍ និងសេចក្ដីត្រូវការរបស់ប្រជាពលរដ្ឋឱ្យមានប្រសិទ្ធភាពខ្ពស់៕