កិច្ចប្រជុំពិនិត្យលើវឌ្ឍនភាពការងារនៃក្រុមបច្ចេកទេសត្រួតពិនិត្យសុវត្ថិភាពយានយន្តដឹកកម្មករនិយោជិត និងប្រឡងបណ្ណបើកបរ ទីស្តីការក្រសួង៖ នាថ្ងៃអង្គារ ទី១៤ ខែកក្កដា ឆ្នាំ២០២៦ ក្រុមការងារបច្ចេកទេសត្រួតពិនិត្យសុវត្ថិភាពយានយន្តដឹកកម្មករនិយោជិត និងប្រឡងបណ្ណបើកបរ បានរៀបចំកិច្ចប្រជុំពិនិត្យលើវឌ្ឍនភាពការងារ ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារ និងដោយមានការអញ្ជើញចូលរួមពីសំណាក់ ឯកឧត្តម ហ៊ឹម យ៉ាន រដ្ឋលេខាធិការ ក្រសួងមហាផ្ទៃ លោកអគ្គនាយករង នៃបេឡាជាតិសន្តិសុខសង្គម និងសមាជិកក្រុមការងារផងដែរ ។ អង្គប្រជុំបានពិភាក្សាទៅវឌ្ឍនភាពការងារ បញ្ហាប្រឈម និងដំណោះស្រាយលើការអនុវត្តសកម្មភាពចុះត្រួតពិនិត្យ រថយន្តប្រភេទដឹកទំនិញបានកែច្នៃដំឡើងមកដឹកជញ្ជូនកម្មករនិយោជិត និងរថយន្តប្រភេទដឹកអ្នកដំណើរបានកែច្នៃបន្ថែមកៅអីអង្គុយ មិនស្របតាមបទដ្ឋានបច្ចេកទេស និងមិនបានត្រួតពិនិត្យលក្ខណៈបច្ចេកទេសយានជំនិះ(ឆៀក) តាមកាលកំណត់ ដែលអាចបណ្តាលឱ្យមានគ្រោះថ្នាក់ចរាចរណ៍កើតឡើងជាយថាហេតុ ដោយសារកត្តាបច្ចេកទេសរបស់រថយន្ត។ បន្ថែមពីនេះក៏បានពិនិត្យ និងផ្តល់យោបល់លើការងារសម្រាប់អនុវត្តបន្តទៀត ដោយជំរុញការត្រួតពិនិត្យរថយន្តទាំងនោះ នៅខេត្តស្វាយរៀង តាមផែនការបានកំណត់ និងបន្តចុះត្រួតពិនិត្យនៅតាមបណ្តាររាជធានី ខេត្តចំនួន១១ ផ្សេងទៀត។ គួរបញ្ជាក់ផងដែរថា ដើម្បីជំរុញឱ្យកិច្ចការងារនេះទទួលបានលទ្ធផលល្អ និងមានតម្លាភាព គឺត្រូវមានការចូលរួមពីគ្រប់ភាគីពាក់ព័ន្ធទំាំងស្ថាប័នរដ្ឋ និងវិស័យឯកជន ដើម្បីលើកកម្ពស់សុវត្ថិភាពចរាចរណ៍ផ្លូវគោក សំដៅកាត់បន្ថយជាអតិបរមានូវគ្រោះថ្នាក់ចរាចរណ៍លើរថយន្តដឹកជញ្ជូនកម្មករនិយោជិត៕