ព្រះសីហនុ ៖ បន្ទាប់ពីផ្លូវ​ចំនួន​៣៧ខ្សែ​ ត្រូវបានសាងសង់​និង​ដាក់ឱ្យប្រើប្រាស់​នៅក្នុងក្រុងព្រះសីហនុ ខេត្តព្រះសីហនុ បាន​ធ្វើឱ្យក្រុង​មួយនេះ ទាក់ទាញបានទាំង​វិនិយោគិន​និងទេសចរដោយមិន​រាប់បញ្ចូល​សកម្មភាពឆបោក​តាមប្រព័ន្ធបច្ចេកវិទ្យា​ដែល​មានមូល​ក្នុងក្រុងព្រះសីហនុ ខេត្ត​ព្រះសីហនុនោះទេ ។​ហេដ្ឋារចនាសម្ព័ន្ធផ្លូវចំនួន ៣៧ខ្សែយ៉ាងខ្វាត់ខ្វែងនេះ បាននិងកំពុងប្រែក្លាយក្រុងព្រះសីហនុ ទៅជាទីក្រុងទំនើប និងមានភាពរីកចម្រើន សម្រួលលំហូរចរាចរណ៍ ទាក់ទាញទេសចរជាតិ និងអន្តរជាតិ បង្កើតការងារធ្វើ បង្កើនប្រាក់ចំណូលដល់ពលរដ្ឋ កាត់បន្ថយការធ្វើចំណាកស្រុក ធ្វើឱ្យប្រជាជនមានជីវភាពល្អប្រសើរមានភាពសុខដុមក្នុងសង្គម។ សូមជម្រាបជូនថា ហេដ្ឋារចនាសម្ព័ន្ធផ្លូវចំនួន ៣៧ខ្សែក្នុងក្រុងព្រះសីហនុ ត្រូវបានបើកការដ្ឋានសាងសង់ កាលពីថ្ងៃទី១៦ ខែវិច្ឆិកា ឆ្នាំ២០១៩ មានប្រវែងសរុប៨៤គីឡូម៉ែត្រ និងមានផ្ទៃក្រឡាសរុប ១ ៤៧០ ៥១១ម៉ែត្រការ៉េ ហើយត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី០២ ខែធ្នូ ឆ្នាំ២០២១ ជាសមិទ្ធផលដែលកើតចេញពីស្នាដៃកូនខ្មែរសុទ្ធសាធ ។ បើតាមអ្នកជំនាញ​នៃវិស័យ​អចលនទ្រព្យ​ប្រចាំខេត្តព្រះសីហនុ បាន​លើកឡើងថា ចាប់តាំងពីផ្លូវ​៣៧ខ្សែ​បានដាក់ឱ្យប្រើប្រាស់ ជាមួយ​នឹ​ងការ​ដាក់ឱ្យប្រើ​ផ្លូវល្បឿនលឿនដំបូង​គេនៅកម្ពុជា ភ្នំពេញ ក្រុងព្រះសីហនុ​ផងដែរនោះ បានធ្វើឱ្យខេត្ត​ព្រះសីហនុ​ទទួលបានការ​វិនិយោគជា​បន្តបន្ទាប់ ជាពិសេស​លើវិស័យឧស្សាហកម្ម ដោយ​វិនិយោគិន​បរទេស​និង​ក្នុងស្រុក​បាន​បណ្ដាក់ទុនលើ​តំបន់សេដ្ឋកិច្ចពិសេស ហើយតំបន់​សេដ្ឋកិច្ចពិសេស​នោះ បានទាក់ទាញវិនិយោគិន​លើរោងចក្រ​ឧស្សាហកម្ម​បន្តទៀត ធ្វើឱ្យសកម្មភាពនៃការ​វិនិយោគក្នុង​ខេត្តជាប់សមុទ្រ​មួយនេះកាន់តែ​មមាញឹក ។ បើក្រលេក​ទៅមើល​ការ​វិនិយោគ និងការរីក​ចម្រើន​ក្នុង​ក្រុងព្រះសីហនុ​ ខេត្តព្រះសីហនុវិញ បាន​សង្កេតឃើញថា អគារ​ខ្ពស់ៗជាច្រើនរីក​ដុះដាល​យ៉ាង​លឿន ទាំង​អគារ​ដែលបានជាប់គាំង​តាំងពីមុនវិបត្តិកូវីដ​១៩​​និងក្នុងវិបត្តិកូវីដ​១៩ បូក​រួម​ជាមួយនឹង​ការ​វិនិយោគថ្មី​ៗ ក្រោយវិបត្តិ​កូវីដ១៩ ធ្វើឱ្យក្រុងមួយនេះ កាន់តែទាក់ទាញ​និង​មានសោភណ្ឌយ៉ាង​ស្រស់ស្អាត​ ។ យោងតាម​ផែនការ​ចក្ខុវិស័យរបស់​ក្រុមការងារជំរុញការ​វិនិយោគខេត្តព្រះសីហនុ បាន​ដាក់ផែនការ​ធ្វើឱ្យខេត្ត​មួយនេះទៅជា​មជ្ឈមណ្ឌល​សេដ្ឋកិច្ច ពាណិជ្ជកម្ម​ និងទេសចរណ៍​ដ៏ពិសិដ្ឋ ដោយ​គ្រោង​នឹងទាក់ទាញទុនវិនិយោគឱ្យបាន​២០​ពាន់​លានដុល្លារអាមេរិក ក្នុងរយៈពេល១៥ឆ្នាំ ហើយនឹងធ្វើឱ្យប្រាក់ចំណូលជាមធ្យមរបស់​ពលរដ្ឋម្នាក់​ៗ​ក្នុងខេត្តមួយនេះ បានឡើងដល់១ម៉ឺនដុល្លារអាម៉េរិក​ក្នុងមួយឆ្នាំ ខណៈបច្ចុប្បន្ន​ ប្រាក់ចំណូលមធ្យមរបស់ពលរដ្ឋម្នាក់​ក្នុងខេត្តព្រះសីហនុ មានប្រមាណ ៥ពាន់​ដុល្លារអាម៉េរិកទៅហើយ៕