“ កត្តាសុខសន្តិភាពបានធ្វើឱ្យយើងទាំងអស់គ្នាមានឱកាសពង្រឹង និងបង្ហាញនូវសមត្ថភាព ទុកជាកេរ្តិ៍តំណែលដល់អ្នកជំនាន់ក្រោយ ” នេះជាការលើកឡើងនៅ ក្នុងសិក្ខាសាលាផ្សព្វផ្សាយអំពីរបាយការណ៍វាយតម្លៃតម្រូវការបណ្ដុះបណ្ដាលសម្រាប់មន្ទីរសាធារណការ និងដឹកជញ្ជូនរាជធានី-ខេត្ត ព្រះសីហនុ៖ ថ្ងៃព្រហស្បតិ៍ ៥កើត ខែបឋមមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែមិថុនា ឆ្នាំ២០២៣ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាផ្សព្វផ្សាយអំពីរបាយការណ៍វាយតម្លៃតម្រូវការបណ្ដុះបណ្ដាលសម្រាប់មន្ទីរសាធារណការ និងដឹកជញ្ជូនរាជធានី-ខេត្ត ដោយក្នុងពិធីនេះក៏មានការចូលរួមពីថ្នាក់ដឹកនាំវិទ្យាស្ថាន ថ្នាក់ដឹកនាំមន្ទីរសាធារណការ និងដឹកជញ្ជូនរាជធានី-ខេត្ត និងមន្ត្រីពាក់ព័ន្ធសរុបប្រមាណ ១០០ នាក់។ សិក្ខាសាលានេះត្រូវបានរៀបចំឡើងក្នុងគោលបំណងដើម្បីផ្សព្វផ្សាយនូវលទ្ធផលដែលទទួលបានតាមរយៈទិន្នន័យដែលបានចុះប្រមូលពីសិក្ខាកាមគោលដៅ ក្នុងការពិនិត្យលទ្ធភាព និងរៀបចំកម្មវិធីបណ្តុះបណ្តាល ដែលឆ្លើយតបទៅនឹងតម្រូវការជាក់ស្តែងរបស់សិក្ខាកាម។ ជាកិច្ចស្វាគមន៍ ឯកឧត្តមនាយកវិទ្យាស្ថាន បានមានប្រសាសន៍លើកឡើងពីការដឹកនាំដ៏ឈ្លាសវៃប្រកបដោយគតិបណ្ឌិត របស់ សម្ដេចតេជោនាយករដ្ឋមន្ដ្រី ព្រមទាំងមានការចង្អុលបង្ហាញប្រកបដោយចក្ខុវិស័យដ៏ឧត្តុងឧត្តមរបស់ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ស្តីពីសក្តានុពលនៃវិស័យសាធារណការ និងដឹកជញ្ជូន ដែលបានរៀបចំស្នើឱ្យប្រែក្លាយ និងតម្លើងវិទ្យាស្ថានជាតិបណ្តុះបណ្តាលបច្ចេកទេស សាធារណការ និងដឹកជញ្ជូន មកជា វិទ្យាស្ថានតេជោសែន សាធារណការ និងដឹកជញ្ជូនសព្វថ្ងៃនេះ។ ក្នុងរយៈពេល៥ឆ្នាំ (២០១៨-២០២៣) វិស័យសាធារណការ និងដឹកជញ្ជូនមានការរីកចម្រើនយ៉ាងឆាប់រហ័សក្រោមម្លប់នៃសុខសន្តិភាព ក្រោមការដឹកនាំរបស់ ឯកឧត្តមទេសរដ្ឋមន្រ្តី ដែលបានជំរុញឱ្យមានហេដ្ឋារចនាសម្ព័ន្ធផ្លូវថ្នល់ ផ្លូវទឹក កំពង់ផែ ស្ពាន ព្រមទាំងផ្លូវល្បឿនលឿនជាដើមផងដែរ។ ជាមួយគ្នានេះ ឯកឧត្តមនាយកវិទ្យាស្ថាន បានលើកឡើងពីកត្តាសុខសន្តិភាពដែលបានធ្វើឱ្យយើងទាំងអស់គ្នាមានឱកាសពង្រឹង និងបង្ហាញនូវសមត្ថភាព ទុកជាកេរ្តិ៍តំណែលដល់អ្នកជំនាន់ក្រោយ។ ទន្ទឹមនឹងនេះដែរ វិទ្យាស្ថានតេជោសែន ក៏ជាផ្នែកមួយមានតួនាទីយ៉ាងសំខាន់សម្រាប់បង្កើតសមត្ថភាពធនធានមនុស្សលើវិស័យសាធារណការ និងដឹកជញ្ជូន។ ក្នុងនោះដែរ ដើម្បីឱ្យការអនុវត្តការងារប្រកបដោយភាពច្បាស់លាស់ និងប្រសិទ្ធភាពធានាបាននូវគុណភាព គឺទាមទារឱ្យមានធនធានគ្រប់គ្រាន់ និងចំណេះជំនាញពិតប្រាកដលើកិច្ចការបច្ចេកទេសផងដែរ។ សូមបញ្ជាក់ថា វិទ្យាស្ថានតេជោសែនសាធារណការ និងដឹកជញ្ជូនផ្តល់ការបណ្តុះបណ្តាល ៣ប្រភេទ ដូចខាងក្រោម៖ (១). ការបណ្តុះបណ្តាលអនាគតវិស្វករផ្លូវថ្នល់ និងអ្នកជំនាញសម្រាប់វិស័យសាធារណការ និងដឹកជញ្ជូន ដែលមានថ្នាក់បរិញ្ញាបត្រ បរិញ្ញាបត្របូក១ (វិស្វករ) បរិញ្ញាបត្រជាន់ខ្ពស់ និងថ្នាក់ក្រោយឧត្តមសិក្សា (បណ្ឌិត) លើជំនាញដែលទាក់ទងនឹងវិស័យសាធារណការ នឹងដឹកជញ្ជូន ដោយបើកជាជំហានៗ។ (២). ការបណ្តុះបណ្តាលជំនាញបច្ចេកទេស មានចំនួនពីរកម្រិត ទី១. មធ្យមបច្ចេកទេសជាន់ខ្ពស់ និងទី២. កម្មករជំនាញ ដែលក្រុមការងារកំពុងសិក្សាស្រាវជ្រាវ ចងក្រង និងអភិវឌ្ឍកម្មវិធីសម្រាប់ការបណ្តុះបណ្តាលនេះ។ (៣). ការបណ្តុះបណ្តាលជំនាញផ្នែកទន់ ដោយផ្តោតទៅលើការអភិវឌ្ឍភាពជាអ្នកដឹកនាំ ផ្នត់គំនិត និងគុណតម្លៃ ដល់និស្សិតរបស់វិទ្យាស្ថានតេជោសែន និងមន្ត្រីរាជការក្រសួងសាធារណការ និងដឹកជញ្ជូន ដើម្បីពង្រឹងប្រសិទ្ធភាព និងគុណភាពធនធានមនុស្សរបស់កម្ពុជាផងដែរ៕