[Khmer News Media Center] - បើកបណ្តោះអាសន្នសេវាដឹកជញ្ជូនអ្នកដំណើរតាមរថភ្លើងផ្លូវ (Tramway) ក្នុងរាជធានីភ្នំពេញ ចូលព្រលានយន្តហោះឲ្យជិះហ្វ្រីដល់ខែសីហា
ភ្នំពេញ៖ព្រឹកថ្ងៃទី១០ ខែមេសា ឆ្នាំ២០១៨ សេវាដឹកជញ្ជូនអ្នកដំណើរ តាមផ្លូវដែក ពីស្ថានីយ៍អាយស្ម័យានភ្នំពេញ ទៅអាកាសយានដ្ឋានអន្តរជាតិភ្នំពេញ មានប្រវែងសរុប ៩.៦១៣ ត្រូវបានឯកឧត្តមទេសរដ្ឋមន្ត្រី ស៊ុន ចាន់ថុលរដ្ឋមន្ត្រីក្រសួងសាធសារណៈការប្រកាសដាក់ឲ្យដំណើរការបណ្តោះអាសន្ន ។ផ្លូវដែកនេះត្រូវបានរៀបចំឡើងជាប្រភេទ Tramway បង្កប់ក្នុងផ្លូវថ្នល់ ថ្នល់ចាក់បេតុង អនុញ្ញាតអោយយានយន្ត និងយានផ្សេងៗ អាចធ្វើដំណើរឆ្លងកាត់បានដោយមិនមានការព្រួយបារម្ភ ដោយមានលាបពណ៌ខៀវ និងលឿង ដើម្បីបញ្ជាក់ថាជាផ្លូវរថភ្លើង ដែលបានសាងសង់ដោយក្រុមហ៊ុន Royal Railway សហការជាមួយក្រសួងសាធារណការ និងដឹកជញ្ជូន។
ដំណាក់កាលដំបូងនេះយើងនឹងប្រើប្រាស់រថភ្លើងចំនួន២គ្រឿងដែលមានស្រាប់ សម្រាប់ការផ្តល់សេវាដឹកជញ្ជូនអ្នកដំណើរទៅមក ខណៈពេលរង់ចាំរថភ្លើងថ្មីចំនួន ០៣គ្រឿងដែលបានបញ្ជាទិញពីប្រទេសម៉ិចស៊ីកូ…។ ទូររថភ្លើងនីមួយៗបំពាក់ដោយម៉ាស៊ីនត្រជាក់ មានកន្លែងអង្គុយសម្រាប់អ្នកដំណើរចំនួន៥៦នាក់ និងអាចឈរបន្ថែមចំនួន ៤៥នាក់ផ្សេងទៀត។
សេវាដឹកជញ្ជូនតាមរថភ្លើងនេះ ចេញដំណើររៀងរាល់ ៣០នាទី ដោយប្រើប្រាស់ថេរវេលាប្រមាណ ២២-២៥នាទី ពីស្ថានីយរាជធានីភ្នំពេញទៅ ស្ថានីយអាកាសយានដ្ឋានអន្តរជាតិភ្នំពេញ។ ក្នុងនោះការបើកឆ្លងកាត់ កំណាត់ផ្លូវសហព័ន្ធរុស្សី ចូលអាកាសយានដ្ឋាន ចំណាយរយៈពេលត្រឹមតែ ២២វិនាទីប៉ុណ្ណោះ។
ក្រោមការសហការជាមួយរដ្ឋលេខាធិការដ្ឋានអាកាសចរណ៍ស៊ីវិល រាល់អ្នកធ្វើដំណើរ តាមជើងយន្តហោះ អាចចុះឈ្មោះ Check in និងដាក់អីវ៉ាន ដោយខ្លួនឯង ជាមួយម៉ាស៊ីនស្វ័យប្រវត្តិ ពីស្ថានីយ៍អាយស្ម័យាន រាជធានីភ្នំពេញបានតែម្តង។ក្នុងរយៈពេលសាកល្បងនេះរាជរដ្ឋាភិបាលកម្ពុជា សម្តេចតេជោនាយករដ្ឋមន្ត្រី បានអនុញ្ញាតអោយប្រជាពលរដ្ឋប្រើប្រាស់សេវានេះដោយឥតគិតថ្លៃ ចាប់ពីថ្ងៃទី១០ ខែមេសា ដល់ថ្ងៃទី០១ ខែសីហា ឆ្នាំ២០១៨៕
