កិច្ចប្រជុំពិភាក្សាសកម្មភាពការងារនារី និងផែនការយុទ្ធសាស្ត្របញ្ជ្រាបយេនឌ័រ តាមប្រព័ន្ធវីដេអូពីចម្ងាយ ត្រូវបានដឹកនាំដោយលោកជំទាវរដ្ឋលេខាធិការ មឹន មាណាវី ថ្ងៃសុក្រ ៤រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២១ ខែមករា ឆ្នាំ២០២២ នៅទីស្តីការ ក្រសួង លោកជំទាវ មឹន មាណាវី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធាន សមាគមនារីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាសកម្មភាពការងារនារី និងផែនការយុទ្ធសាស្ត្របញ្ជ្រាបយេនឌ័រ ដោយមានការចូលរួមដោយផ្ទាល់ និងតាមប្រព័ន្ធវីដេអូពី ចម្ងាយពីស្ត្រីជាថ្នាក់ដឹកនាំ តំណាងនារីមកពីអង្គភាពចំណុះឱ្យក្រសួង ស្ត្រីជាអគ្គនាយករង និងជាប្រធាន-អនុប្រធាននាយកដ្ឋាន ដោយផ្តោតជាសំខាន់លើរបៀបវារៈស្តីពីការរៀបចំប្រារព្វពិធីអបអរសាទរខួបលើក ទី១១១ នៃទិវាអន្តរជាតិនារី៨មីនា ឆ្នាំ២០២២ និងផែនការយុទ្ធសាស្ត្របញ្ជ្រាបយេនឌ័រ។ ថ្លែងក្នុងចំណាប់អារម្មណ៍នាឱកាសនោះ លោកជំទាវរដ្ឋលេខាធិការ បានស្នើឱ្យតំណាងជាស្ត្រីគ្រប់អគ្គនាយកដ្ឋាន នាយកដ្ឋាន និងអង្គភាពក្រោមឱវាទក្រសួង រៀបចំធ្វើបច្ចុប្បន្នភាពស្ថិតិមន្ត្រីរាជការជានារី ព្រមទាំងរៀបចំកែសម្រួលរចនាសម្ព័ន្ធសមាគមនារីកម្ពុជាដើម្បីសមភាពយេនឌ័រថ្ងៃនេះ ដើម្បីនារីនាពេល អនាគត។ គួរកត់សម្គាល់ថា៖ រាជរដ្ឋាភិបាលកម្ពុជា បានយកចិត្តទុកដាក់ក្នុងការលើកកម្ពស់សមភាពយេនឌ័រ ការពង្រឹងភាពអង់អាចក្លាហានរបស់នារី ដើម្បីឱ្យពួកគាត់ក្លាយជាកម្លាំងចលករដ៏សំខាន់ក្នុងកិច្ចអភិវឌ្ឍសង្គម និងសេដ្ឋកិច្ចតាមរយៈការដាក់ចេញនូវគោលនយោបាយជាតិស្ដីពីសមភាពយេនឌ័រ សម្រាប់ជាផែនទីបង្ហាញផ្លូវក្នុងការលើកកម្ពស់ និងបញ្ជ្រាបយេនឌ័រនៅតាមស្ថាប័ន៕