លោកជំទាវរដ្ឋលេខាធិការ ឥម នីថារ៉ា ដឹកនាំក្រុមការងារជំនាញពាក់ព័ន្ធរបស់ក្រសួងចូលរួមកិច្ចប្រជុំពិភាក្សាស្តីពី យុទ្ធសាស្ត្រស្តីពីកែទម្រង់ការគ្រប់គ្រងសហគ្រាសសាធារណៈ តាមប្រព័ន្ធវីដេអូពីចម្ងាយ ថ្ងៃពុធ ២រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៩ ខែមករា ឆ្នាំ២០២២ នៅទីស្តីការក្រសួង លោកជំទាវ ឥម នីថារ៉ា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារជំនាញពាក់ព័ន្ធរបស់ក្រសួងចូលរួមកិច្ចប្រជុំពិភាក្សាស្តីពីយុទ្ធសាស្ត្រកែទម្រង់ការគ្រប់គ្រងសហគ្រាសសាធារណៈ តាមប្រព័ន្ធវីដេអូពីចម្ងាយ ក្រោមអធិបតីភាពឯកឧត្តម អៀង ស៊ុនលី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារបច្ចេកទេសកែទម្រង់សហគ្រាសសាធារណៈ ដោយមានការចូលរួមដោយផ្ទាល់ពីឯកឧត្តមអនុរដ្ឋលេខាធិការ លោកអគ្គនាយករង លោកអគ្គនាយកមន្ទីរពិសោធន៍សំណង់ និងសាធាណការ និងមន្ត្រីជំនាញពីកំពង់ផែស្វយ័តក្រុងភ្នំពេញ។ កិច្ចប្រជុំពិភាក្សានេះផ្តោតជាសំខាន់លើការសិក្សាអំពីបញ្ហាប្រឈមនានា ក៏ដូចជាចំណុចខ្លាំង និងចំណុចខ្សោយនៃការអនុវត្តការគ្រប់គ្រងសហគ្រាសសាធារណៈ ទិសដៅសម្រាប់កែទម្រង់សហគ្រាសសាធារណៈ និងវិធានការអនុវត្តយុទ្ធសាស្ត្រកែទម្រង់ សម្រាប់ជាមូលដ្ឋានក្នុងការរៀបចំសេចក្តីព្រាងយុទ្ធសាស្ត្រកែទម្រង់សហគ្រាសសាធារណៈឱ្យស្របតាមឧត្តមានុវត្តន៍ជាអន្តរជាតិ និងស្របតាមបរិការណ៍ជាក់ស្តែងរបស់ប្រទេសកម្ពុជា ដើម្បីដាក់ជូនរាជរដ្ឋាភិបាលពិនិត្យ និងសម្រេច។ សូមជម្រាបថា៖ វិធានការចំពោះមុខក្នុងការអនុវត្តយុទ្ធសាស្រ្តកែទម្រង់ការគ្រប់គ្រងសហគ្រាសសាធារណៈ គឺត្រូវរៀបចំធ្វើការកែសម្រួលសេចក្តីព្រាងច្បាប់ស្តីពីលក្ខន្តិកៈទូទៅនៃសហគ្រាសសាធារណៈមកជាសេចក្តីព្រាងច្បាប់ស្តីពីការគ្រប់គ្រងសគ្រាសសាធារណៈ និងរៀបចំសេចក្តីព្រាងអនុក្រឹត្យមួយចំនួន សម្រាប់អនុវត្តច្បាប់ស្តីពីការគ្រប់គ្រងសហគ្រាសសាធារណៈ និងគោលការណ៍សំខាន់សម្រាប់រៀបចំ ក្រមសីលធម៌ក្នុងការបំពេញការងារប្រចាំថ្ងៃប្រកបដោយតម្លាភាព សុចរិតភាព និងគណនេយ្យភាព៕