ថ្ងៃសៅរិ៍ ១៣រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែតុលា ឆ្នាំ២០១៩ ឯកឧត្តម ឈួន វ៉ន់ អគ្គនាយក ថ្នាក់ដឹកនាំ ព្រមទាំងមន្ត្រីរាជការ នៃអគ្គនាយកដ្ឋានដឹកជញ្ជូនផ្លូវគោក បានចូលរួមជាមួយ ឯកឧត្តម ស៊ុន ចាន់ថុល ទេស រដ្ឋមន្ត្រី រដ្ឋមន្ដ្រី ក្រសួងសាធារណការ និងដឹកជញ្ជូន ថ្នាក់ដឹកនាំ និងមន្ត្រីរាជការក្រោមឱវាទក្រសួង ដង្ហែអង្គកឋិនទានសាមគ្គីទៅកាន់វត្តសុវណ្ណគិរី ហៅវត្តពើងបាក់រទេះ ស្ថិតនៅភូមិអូរ ឃុំខ្វាវ ស្រុកជីក្រែង ខេត្តសៀមរាប ដើម្បីនាំយកបច្ច័យទៅប្រគេន ព្រះសង្ឃដែលគង់ចាំវស្សាអស់កាលត្រីមាស។ ឯកឧត្តមទេសរដ្ឋមន្ត្រី បានសម្តែងនូវសេចក្តីសោមនស្សរីករាយជាអនេកដែលបានឃើញមន្ត្រីរាជការគ្រប់ជាន់ថ្នាក់ និងពុទ្ធបរិស័ទញាតិមិត្តជិតឆ្ងាយបានស្រុះស្រួមូលមតិគ្នារៀបចំបុណ្យកឋិនទានសាមគ្គីនេះ ឡើងប្រកបដោយទឹកចិត្តជ្រះថ្លា និងស្មារតីសាមគ្គីភាពយ៉ាងជិតស្និទ្ធ ឯកឧត្តមបាន បួងសួងដល់ទេវតាប្រទានពរជ័យ សិរីមង្គល វិបុលសុខ កើតមានដល់ប្រជាពលរដ្ឋខ្មែរគ្រប់ៗរូប និងសូមជួបតែពុទ្ធរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងជូននូវកុសលផលបុណ្យចំពោះមន្រ្តីរាជការ និងពុទ្ធបរិស័ទញាតិមិត្តជិតឆ្ងាយទាំងអស់ សូមបានសុខចម្រុងចំរើន មានសន្តិភាព និងការអភិវឌ្ឍរីកចំរើនជារៀងរហូតតទៅ៕