កិច្ចប្រជុំក្រុមការងារផ្នែកដឹកជញ្ជូន និងហេដ្ឋារចនាសម្ព័ន្ធ ក្រុម “ច” នៃដៃគូពិភាក្សាការងារជាមួយវិស័យឯកជន ទីស្តីការក្រសួង៖ នាថ្ងៃសុក្រ ទី១០ ខែកក្កដា ឆ្នាំ២០២៦ លេខាធិការដ្ឋានក្រុមការងារផ្នែកដឹកជញ្ជូន និងហេដ្ឋារចនាសម្ព័ន្ធ (ក្រុម “ច”) នៃក្រសួងសាធារណការ និងដឹកជញ្ជូន បានរៀបកិច្ចប្រជុំក្រុមការងារផ្នែកដឹកជញ្ជូន និងហេដ្ឋារចនាសម្ព័ន្ធ ក្រុម “ច” នៃដៃគូពិភាក្សាការងារជាមួយវិស័យឯកជន (ក្រុមការងារកម្រិតបច្ចេកទេស) លើបញ្ហាប្រឈមដែលបានស្នើឡើងដោយផ្នែកឯកជន តាមរយៈការសម្របសម្រួលពីសភាពាណិជ្ជកម្មកម្ពុជា (សភពណ) ក្រោមអធិបតីភាព ឯកឧត្ដម ឈៀង ពេជ្រ អនុរដ្ឋលេខាធិការ និងជាអនុប្រធានអចិន្រ្តៃយ៍ក្រុមការងារផ្នែកដឹកជញ្ជូន និងហេដ្ឋារចនាសម្ព័ន្ធ (ក្រុម “ច”) និងសហប្រធាន ឧកញ៉ា បណ្ឌិត ឈិន កេន សមាជិកសភាពាណិជ្ជកម្មកម្ពុជា។ កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យ និងពិភាក្សាលម្អិត លើបញ្ហាប្រឈម សំណូមពរ និងដំណោះស្រាយនានា ក្នុងកម្រិតបច្ចេកទេស ដោយមានសមាសភាពអញ្ជើញចូលរួមពីតំណាងសភាពាណិជ្ជកម្មកម្ពុជា តំណាងសមាគមដឹកជញ្ជូនទំនិញ CAMTA តំណាងសមាគមន៍ភស្តុភារកម្មកម្ពុជា CLA តំណាងក្រសួងមហាផ្ទៃ តំណាងអគ្គនាយកដ្ឋាពន្ធដារ និងតំណាងរដ្ឋបាលរាជធានីភ្នំពេញ។ ជាលទ្ធផល កិច្ចប្រជុំកម្រិតបច្ចេកទេសនេះ បានដោះស្រាយបញ្ហាប្រឈមចំនួន ១១ ក្នុងចំណោម ១៣ ដែលលើកឡើងដោយផ្នែកឯកជន ហើយចំណែកបញ្ហាប្រឈមចំនួន ២ ទៀត នឹងត្រូវដោះស្រាយនៅក្នុងកម្រិតថ្នាក់ដឹកនាំ៕