សន្និសីទស្តីពី សុវត្ថិភាពនាវានេសាទ និងការនេសាទខុសច្បាប់ (Fishing Vessels Safety and IUU Fishing) ប្រទេសអេស្បាញ --- ថ្ងៃចន្ទ ពុធ ០៨-១០រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២១-២៣ ខែតុលា ឆ្នាំ២០១៩ ឯកឧត្តម​ រស់​ ​វណ្ណា​ រដ្ឋ​លេខាធិការ​ ក្រសួងសាធារណការ និងដឹកជញ្ជូន បានដឹកនាំប្រតិភូកម្ពុជាចូលរួមសន្និសីទថ្នាក់រដ្ឋមន្ត្រីស្តីពីសុវត្ថិភាពនាវានេសាទ និងការនេសាទខុសច្បាប់ គ្មានរបាយការណ៍ និងគ្មានការអនុញ្ញាត​ (Ministerial Conference on​ Fishing Vessels Safety and Illegal, Unreported and Unregulated (IUU) Fishing) នៅទីក្រុងម៉ាឡាហ្គា ប្រទេសអេស្បាញ។ សន្និសីទអន្តរជាតិនេះសហការរៀបចំឡើងដោយរដ្ឋាភិបាលប្រទេសអេស្បាញ ជាមួយអង្គការនាវាចរណ៍សមុទ្រអន្តរជាតិ IMO​ អង្គការ​ FAO អង្គការ The Pew Charitable Trusts ដោយមានការចូលរួមពីរដ្ឋជាសមាជិកអង្គការ IMO អង្គការពលកម្មពិភពលោក ILO IGOs NGOs and អ្នកសង្កេតការណ៍អន្តរជាតិផងដែរ។ សន្និសីទនេះមានគោលបំណងលើកកម្ពស់ការផ្តល់សច្ចាប័នលើកិច្ចព្រមព្រៀងអន្តរជាតិ Cape Town ឆ្នាំ២០១២ ដែលមានប្រតិភូចូលរួមពីរដ្ឋជាសមាជិកអង្គការ IMO​ ចំនួន៤៦ប្រទេស។ កិច្ចព្រមព្រៀងCape Town ឆ្នាំ២០១២ (Cape Town Agreement of 2012) មានសារៈសំខាន់ក្នុងការរក្សាសុវត្ថិភាពនាវានេសាទ និងការអនុវត្តច្បាប់អន្តរជាតិ ដើម្បីពង្រឹងការអនុវត្តតាមបទដ្ឋានអន្តរជាតិចំពោះការចុះបញ្ជីនាវានេសាទថ្មីប្រវែងស្មើ ឬលើសពី២៤ម៉ែត្រ ការប្រយុទ្ធប្រឆាំងនឹងការនេសាទខុសច្បាប់ លក្ខខណ្ឌការងារនាវិក និងការបំពុលបរិស្ថាន។ តាមរបាយការណ៍បង្ហាញថា គ្រោះថ្នាក់នាវានេសាទបណ្តាលអោយកម្មករនាវានេសាទបាត់បង់ជីវិតក្នុង១ឆ្នាំជាមធ្យមចំនួន២៤០០០ នាក់ទូទាំងពិភពលោក ក្នុងចំណោមនាវានេសាទប្រមាណ ៤០លានគ្រឿង​ ទើបអង្គការ IMO​ បានបង្កើនការយកចិត្តទុកដាក់ក្នុងកិច្ចការប្រយុទ្ធប្រឆាំងនឹងការនេសាទខុសច្បាប់ ដោយលើកទឹកចិត្តអោយរដ្ឋជាសមាជិកផ្តល់សច្ចាប័នចូលជាភាគីកិច្ចព្រមព្រៀងCape Town ២០១២ តាមរយៈការសម្របសម្រួលនីតិវិធីនៅក្នុងកិច្ចប្រជុំលើកទី២៩ ពិសេសការរៀបចំសន្និសីទអន្តរជាតិ​ សិក្ខាសាលាថ្នាក់តំបន់ វគ្គបណ្តុះបណ្តាលថ្នាក់តំបន់ ដើម្បីផ្សព្វផ្សាយអំពីសារៈសំខាន់នៃកិច្ចព្រមព្រៀងខាងលើនេះ៕