ភ្នំពេញៈ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកញ្ជូន បានថ្លែងថា កម្ពុជាកំពុងជំរុញ ឲ្យមានការបង្កើតនូវប្រព័ន្ធអេកូស៊ីស្ទឹម ដែលផ្តល់លក្ខណៈងាយស្រួល ដល់អ្នកវិនិយោគ ដើម្បីឆ្លើយតបទៅនឹងបញ្ហាប្រឈមនានា។ កម្ពុជាមានសក្ដានុពល ក្នុងការទាញប្រយោជន៍ ពីពាណិជ្ជកម្មតាមប្រព័ន្ធអេឡិកត្រូនិក (e-commerce) ដើម្បីផ្ដល់ភាពងាយស្រួល និងបង្កើនប្រសិទ្ធភាពដល់អតិថិជន ក្នុងការទទួលបានព័ត៌មានពាណិជ្ជកម្ម ដូច្នេះពាណិជ្ជកម្មតាមប្រព័ន្ធអេឡិកត្រូនិក មានអត្ថប្រយោជន៍ ក្នុងការធ្វើពាណិជ្ជកម្មអន្ដរជាតិ ព្រមទាំងមានសក្ដានុពល ក្នុងការជួយលើកកម្ពស់ទីផ្សារក្នុងស្រុក។ ក្នុងពិធីចុះហត្ថលេខាលើ អនុស្សរណៈយោគយល់គ្នា និងកិច្ចព្រមព្រៀងសហហិរញ្ញប្បទាន រវាង UNDP និងក្រុមហ៊ុន 4PX EXPRESS CO LTD លើគម្រោងផ្សារភ្ជាប់កម្ពុជា រួមគ្នាឆ្ពោះទៅរកសេដ្ឋកិច្ចឌីជីថល នៅថ្ងៃទី១៩ ខែមីនា ឆ្នាំ២០១៩ លោក ស៊ុន ចាន់ថុល មានប្រសាសន៍ថា “រាជរដ្ឋាភិបាលកម្ពុជាប្ដេជ្ញាជំរុញ ឲ្យមានការបង្កើតនូវប្រព័ន្ធអេកូស៊ីស្ទឹមមួយ ដែលផ្ដល់លក្ខណៈងាយស្រួល ទៅដល់អ្នកវិនិយោគ តាមរយៈក្រុមប្រឹក្សាជាតិភស្ដុភារ ដើម្បីឆ្លើយតបទៅនឹងបញ្ហាប្រឈាមនានា ក្នុងសេវាភស្ដុភារ និងបង្កើនប្រសិទ្ធភាពលំហូរទំនិញ និងសេវាកម្ម”។ លោកបន្ដថា សេដ្ឋកិច្ចដែលមានវិស័យពាណិជ្ជកម្ម តាមប្រព័ន្ធអេឡិកត្រូនិក គឺរឹងមាំទាមទារ ឲ្យមានការធ្វើកំណែទម្រង់ ជាមូលដ្ឋានមួយចំនួន ដើម្បីឲ្យមានការចែកចាយផលិតផល កាន់តែលឿនជាងមុន និងអាចដោះស្រាយបញ្ហាប្រឈមជុំវិញ សេវាភស្តុភារបានយ៉ាងរហ័ស។ ឱកាសនោះដែរ ប្រធានយកប្រតិបត្តិ នៃក្រុមហ៊ុន Shenzhen 4PX Express លោក Yue (KEVIN) Li បានឲ្យដឹងដែរថា សេវាភស្តុភារឆ្លងដែន នឹងបង្កើតមធ្យោបាយសម្រាប់ឲ្យកម្ពុជា ទទួលបានប្រយោជន៍ពីចរន្តដ៏រស់រវើក នៃពាណិជ្ជកម្ម តាមប្រព័ន្ធអេឡិកត្រូនិកក្នុងតំបន់ ដោយមានការជំរុញបន្ថែម ពីសមាហរណកម្មអាស៊ាន។ វាក៏នឹងជួយឲ្យកម្ពុជា ទទួលបានប្រយោជន៍ តាមរយៈការវិនិយោគកាន់តែច្រើន ពីសំណាក់ក្រុមហ៊ុនអន្តរជាតិធំៗ ដែលកំពុងផ្តល់សេវាពាណិជ្ជកម្ម តាមប្រព័ន្ធអេឡិកត្រូនិក និងភស្តុភារនៅក្នុងប្រទេសនេះ។ លោកបញ្ជាក់ថា ពាណិជ្ជកម្មតាមប្រព័ន្ធអេឡិកត្រូនិក ពិតជាមានសក្តានុពល យ៉ាងធំធេងនៅកម្ពុជា។ ពាណិជ្ជកម្មតាមប្រព័ន្ធអេឡិកត្រូនិកនេះ ជាឧបករណ៍កសាងឱកាស ដើម្បីបើកទ្វារបន្ថែមទៀត ឲ្យទីផ្សារក្នុងស្រុក ទទួលបានឱកាសរីកចម្រើន និងទទួលបានការទទួលស្គាល់ ក្នុងទីផ្សារសកល។ ចំណែកលោក Nick Beresford អ្នកតំណាង UNDP ប្រចាំកម្ពុជា បានលើកឡើងថា សេដ្ឋកិច្ចឌីជីថល បានកំពុងនឹងប្រែក្លាយកម្ពុជា តាមរយៈការផ្លាស់ប្តូរទម្លាប់បញ្ជាទិញអាហារ ទូទាត់ថ្លៃទំនិញ ហៅរ៉ឺម៉ក់កង់បី (tuk-tuk) កក់សណ្ឋាគារ ឬទិញសម្លៀកបំពាក់ពីតាមហាងជាដើម។ សេវាទាំងនេះ បានជួយសម្រួល ដល់ទំនាក់ទំនងរវាងអតិថិជន និងប្រកបអជីវកម្មតាមប្រព័ន្ធអនឡាញ។ លោកអះអាងថា ប្រព័ន្ធអេកូស៊ីស្ទឹម សម្រាប់ការធ្វើពាណិជ្ជកម្ម តាមប្រព័ន្ធអេឡិកត្រូនិក មានគោលបំណង លើកកម្ពស់ បរិយាបន្ន និងភាពងាយស្រួល ក្នុងការទទួលបានសេវាកម្ម ក្រោមការចូលរួម ពីតួអង្គពាក់ព័ន្ធសំខាន់ៗ រួមមាន ៖ រាជរដ្ឋាភិបាល ធុរកិច្ច និងឯកត្តជន ឬអ្នកប្រើប្រាស់៕