(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមមន្រ្តីនៃព្រះរាជាណាចក្រកម្ពុជា បានចេញ អនុក្រឹត្យ រំសាយសហគ្រាសសាធារណៈ «ភ្នាក់ងារកម្ពុជានាវាចរ ហៅថា កាំសាប»។ នេះបើយោងតាម អនុក្រឹត្យចុះថ្ងៃទី០៥ ខែកុម្ភៈ ឆ្នាំ២០១៩។ តាមអនុក្រឹត្យខាងលើ ដែល Swift News ទើបទទួលបាន ត្រង់មាត្រាមួយបានចែងថា «ត្រូវបានបញ្ចប់បេសកកម្ម និងរំសាយសហគ្រាសសាធារណៈ ដែលមានលក្ខណៈជាក្រុមហ៊ុនរដ្ឋឈ្មោះ ភ្នាក់ងា កម្ពុជានាវាចរ ហៅថា កាំសាប ដែលបានបង្កើតឡើងដោយអនុក្រឹត្យលេខ ៨១ ចុះថ្ងៃទី៣០ ខែសីហា ឆ្នាំ១៩៩៩ ស្តីពី ការបង្កើតសហគ្រាសសាធារណៈភ្នាក់ងាកម្ពុជានាវាចរ (កាំសាប) ចាប់ពីម៉ោងសូន្យ នាថ្ងៃទី២៨ ខែកុម្ភៈ ឆ្នាំ២០១៩ នេះតទៅ។ សូមរំឭកថា កាលពីថ្ងៃទី២៥ ខែមករា ឆ្នាំ២០១៩ ក្នុងជំជួបសំណេះសំណាលជាមួយបងប្អូនកម្មករ កម្មការិនីប្រមាណ១១,៧៣៨នាក់ មកពីរោងចក្រ សហគ្រាសចំនួន១២ ក្នុងខេត្តកំពត សម្តេចអគ្គមហាសេនាបតីតេជោ ហ៊ុន សែន បានប្រកាសឲ្យរំសាយភ្នាក់ងារកម្ពុជានាវាចរ (Kampuchea Shipping Agency & Brokers – កាំសាប) ដើម្បីកាត់បន្ថយការរំខានដល់ការវិនិយោគនៅក្នុងប្រទេសកម្ពុជា។ សម្តេចតេជោ ហ៊ុន សែន មានប្រសាសន៍ថា «កាំសាបបង់ចូលរដ្ឋកន្លះលានដុល្លារ គឺមិនស្កៀបមាត់ទេ។ មិនស្មើប្រាក់ខែរោងចក្របើកឲ្យកម្មករមួយខែផង»៕