កិច្ចប្រជុំពិនិត្យវឌ្ឍនភាពការងារ នៃគម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក នៅក្រុងតាខ្មៅ ខេត្តកណ្ដាល កណ្ដាល៖ នាថ្ងៃអង្គារ ទី១៦ ខែមិថុនា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារអនុវត្តគម្រោង ចូលរួមក្នុងកិច្ចប្រជុំពិនិត្យវឌ្ឍនភាពការងារ សម្រាប់គម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក នៅក្រុងតាខ្មៅ ខេត្តកណ្ដាល ជាមួយក្រុមការងារបេសកកម្មរបស់ធនាគារពិភពលោក ដឹកនាំដោយ លោកស្រី Katelijn van den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារបេសកម្មរបស់ធនាគារពិភពលោក (WB)ដោយមានការអញ្ជើញចូលរួមពី លោកប្រធានគ្រប់គ្រងគម្រោង និងសមាជិកគម្រោង នៃក្រសួងសាធារណការ និងដឹកជញ្ជូន លោកអភិបាលរងខេត្តកណ្ដាល ជាប្រធានសម្របសម្រួលគម្រោង រដ្ឋបាលខេត្ត-ក្រុង ខេត្តកណ្ដាល លោក-លោកស្រី ជាតំណាងក្រសួងសេដ្ឋកិច្ច និងហិរញ្ញវត្ថុ សមាជិកគម្រោងតំណាងក្រសួងមហាផ្ទៃ ក្រុមការងារទីប្រឹក្សាប្រតិបត្តិការ CriSil ក្រុមហ៊ុនទីប្រឹក្សាបច្ចេកទេស DOHWA Engineering និងក្រុមហ៊ុន Es International Consultants តំណាងក្រុមហ៊ុនស៊ីនទ្រី និងមន្ត្រីដែលពាក់ព័ន្ធផងដែរ។ កិច្ចប្រជុំនេះរៀបចំក្នុងគោលបំណងដើម្បីពិភាក្សាលម្អិតអំពីវឌ្ឍនភាពការងាររបស់ទីប្រឹក្សាប្រតិបត្តិការក្នុងការវិភាគកាកសំណល់ (Upstream Waste Analysis) សម្រាប់ខេត្តកណ្តាល និងការពិនិត្យពិភាក្សាលើការរចនាប្លង់លម្អិតសម្រាប់ការសាងសង់ទីលានទុកដាក់សំរាម និងទីតាំងកែច្នៃកាកសំណល់ របស់ក្រុមហ៊ុនទីប្រឹក្សាបច្ចេកទេស DOHWA Engineering និងក្រុមហ៊ុន Es International Consultants ផងដែរ៕