កិច្ចប្រជុំពិនិត្យពិភាក្សា Term of References សម្រាប់ការសិក្សាសមិទ្ធិលទ្ធភាពនៃគម្រោងពង្រឹងការតភ្ជាប់ភាពធន់នឹងអាកាសធាតុ ទីស្ដីការក្រសួង៖ នាថ្ងៃសុក្រ ទី២២ ខែឧសភា ឆ្នាំ២០២៦ ឯកឧត្ដម សុខុម ភគវន្តមុនី រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំកិច្ចប្រជុំពិនិត្យពិភាក្សា Term of References ក្រោមក្របខ័ណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) សម្រាប់ការសិក្សាសមិទ្ធិលទ្ធភាពនៃគម្រោងខាងលើសម្រាប់ការសាងសង់របៀងផ្លូវចំនួន ២ខ្សែ៖ ១). ផ្លូវជាតិតភ្ជាប់ពីខេត្តបាត់ដំបងទៅខេត្តសៀមរាប និង ២).ផ្លូវជាតិលេខ ៦០បេ ដោយបានការអញ្ជើញចូលរួមពី ឯកឧត្ដម អនុរដ្ឋលេខាធិការ អគ្គនាយក អគ្គនាយករង ជានាយករងគម្រោង លោកប្រធានគ្រប់គ្រងគម្រោង សមាជិក-សមាជិកាគម្រោង ព្រមទាំងមន្ទីរសាធារណការ និងដឹកជញ្ជូនខេត្ដពាក់ព័ន្ធក្រោមឱវាទក្រសួង។ កិច្ចប្រជុំនេះត្រូវបានរៀបចំឡើងក្នុងគោលបំណងប្រមូលធាតុចូលបន្ថែម និងពិនិត្យពិភាក្សាឱ្យបានល្អិតល្អន់តាមលក្ខណៈបច្ចេកទេស លើការរៀបចំលក្ខខណ្ឌយោង (Term of References - TOR) សម្រាប់ការជ្រើសរើសក្រុមហ៊ុនទីប្រឹក្សាបច្ចេកទេស មកធ្វើការសិក្សាសមិទ្ធិលទ្ធភាព (Feasibility Study) នៃគម្រោងខាងលើ៕