រដ្ឋមន្រ្តីក្រសួងសាធារណការ និងដឹកជញ្ជូន បានដាក់បញ្ជាឲ្យគ្រប់ស្ថានីយថ្លឹងរថយន្តទូទាំងប្រទេសត្រូវភ្ជាប់ប្រព័ន្ធកាមេរ៉ាសុវត្ថិភាព CCTV មកការិយាល័យកណ្តាលក្រសួងសាធារណការ និងដឹកជញ្ជូន ដើម្បីតាមដានប្រសិទ្ធភាពនៃការអនុវត្តការត្រួតពិនិត្យយានយន្តដឹកលើសទម្ងន់ ដើម្បីធានាបានការដឹកជញ្ជូនស្របតាមបច្ចេកទេសកុំឲ្យឈានទៅដល់ការដឹកលើសទម្ងន់ដែលនាំខូចខាតហេដ្ឋារចនាសម្ព័ន្ធផ្លូវថ្នល់។ថ្លែងនៅក្នុងការឆ្មក់ចុះពិនិត្យផ្ទាល់សកម្មភាពត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ព្រៃព្នៅ ខេត្តព្រៃវែង លោក ប៉េង ពោធិ៍នា រដ្ឋមន្រ្តីក្រសួងសាធារណការនិងដឹកជញ្ជូន និងជាប្រធានគណៈកម្មាធិការដឹកនាំការងារត្រួតពិនិត្យយានយន្តដឹកលើសទម្ងន់កម្រិតកំណត់ បានដាក់ចេញនូវវិធានការតឹងរ៉ឹងជាបន្ទាន់ បន្ទាប់ពីបានរកឃើញជាក់ស្តែងនូវរថយន្តដឹកទំនិញលើសទម្ងន់កម្រិតកំណត់រហូតដល់ទៅ ៨៣ តោន។ដើម្បីធានាប្រសិទ្ធភាពក្នុងការតាមដាន គ្រប់គ្រង និងត្រួតពិនិត្យ លោករដ្ឋមន្រ្តីបានដាក់បញ្ជាឲ្យរៀបចំដំឡើងប្រព័ន្ធកាមេរ៉ាសុវត្ថិភាព CCTV នៅគ្រប់ស្ថានីយជញ្ជីងអចល័តទាំងអស់ទាំង ៤៣ ទូទាំងប្រទេស។ ប្រព័ន្ធនេះនឹងត្រូវតភ្ជាប់មកប្រព័ន្ធកណ្តាលរបស់ក្រសួងសាធារណការ និងដឹកជញ្ជូន ព្រមទាំងតភ្ជាប់ដោយផ្ទាល់មកកាន់ទូរសព្ទដៃរបស់ថ្នាក់ដឹកនាំ ដើម្បីងាយស្រួលក្នុងការត្រួតពិនិត្យបន្ថែម។ លោកបានព្រមានពីការអនុវត្តអភិក្រមវះកាត់លើមន្ត្រីពាក់ព័ន្ធ ប្រសិនបើរកឃើញមានមន្ត្រីណាម្នាក់ជាប់ពាក់ព័ន្ធឬចូលរួមសកម្មភាពអនុញ្ញាតឱ្យមានការដឹកជញ្ជូនលើសទម្ងន់នេះ ដោយយកអភិក្រមវះកាត់មកអនុវត្តតែម្តងដោយគ្មានការលើកលែងឡើយ។ លោកបន្តថា គណៈកម្មាធិការដឹកនាំការងារត្រួតពិនិត្យយានយន្តដឹកលើសទម្ងន់កម្រិតកំណត់ នឹងបង្កើតក្រុមការងារបង្កើតក្រុមការងារពិសេសមួយដើម្បីចុះទប់ស្កាត់ និងបង្ក្រាបយ៉ាងម៉ឺងម៉ាត់បំផុតចំពោះយានយន្តដឹកលើសទម្ងន់ទាំងឡាយណាដែលព្យាយាមបើកគេច ឬបើកវាងមិនព្រមចូលថ្លឹងនៅស្ថានីយ។ ជាមួយគ្នានេះ លោកណែនាំឲ្យដំឡើងផ្លាកសញ្ញានិងដាក់ពង្រាយមន្ត្រីចល័ត ដើម្បីផ្តល់ដំណឹងដល់អ្នកដឹកជញ្ជូនទាំងអស់ឱ្យបានដឹងថានៅខាងមុខស្ថានីយគឺមានវត្តមានមន្ត្រីចល័ត ដែលរង់ចាំទប់ស្កាត់រាល់សកម្មភាពបើកគេចមិនចូលស្ថានីយ៕