ឯកឧត្តម ហេង ណន រដ្ឋលេខាធិការ តំណាងឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ បំពាក់គ្រឿងឥស្សរិយយសការងារ ជូនមន្ត្រីរាជការ និងមន្ត្រីជាប់កិច្ចសន្យា នៃរដ្ឋបាលស្រុកកោះធំ ដែលបានបំពេញការងារលើសពី ១០ឆ្នាំ ខេត្តកណ្តាល៖ នាថ្ងៃសុក្រ ទី២៧ ខែមីនា ឆ្នាំ២០២៦ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះធំ បានអញ្ជើញជាអធិបតី ក្នុងពិធីបំពាក់គ្រឿងឥស្សរិយយសការងារ ជូនមន្ត្រីរាជការ និងមន្ត្រីជាប់កិច្ចសន្យា នៃរដ្ឋបាលស្រុកកោះធំ ដែលបានបំពេញការងារលើសពី ១០ឆ្នាំ និងមិនធ្លាប់ទទួលបានគ្រឿងឥស្សរិយយសកន្លងមក។ ពិធីនេះក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីរាជការ ពាក់ព័ន្ធជាច្រើនរូប។ ពិធីបំពាក់គ្រឿងឥស្សរិយយសនេះ រៀបចំឡើង ដើម្បីលើកទឹកចិត្ត និងសរសើរចំពោះមន្ត្រីរាជការ និងមន្ត្រីជាប់កិច្ចសន្យា ដែលបានខិតខំបំពេញភារកិច្ចយ៉ាងស្មោះត្រង់ និងទទួលបានស្នាដៃល្អ ក្នុងការបម្រើជាតិ និងប្រជាពលរដ្ឋ។ គ្រឿងឥស្សរិយយសមេដាយសំរឹទ្ធការងារនេះ ត្រូវបានរាជរដ្ឋាភិបាលផ្តល់ជូន ដោយបានមកដល់រដ្ឋបាលស្រុកកោះធំ កាលពីថ្ងៃទី៩ ខែមីនា ឆ្នាំ២០២៦ កន្លងទៅ។ អនុវត្តតាមអនុសាសន៍ដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងការណែនាំរបស់រដ្ឋបាលខេត្តកណ្តាល រដ្ឋបាលស្រុកកោះធំ បានអនុវត្តនីតិវិធីយ៉ាងម៉ត់ចត់ ក្នុងការស្រាវជ្រាវ ពិនិត្យលក្ខណៈសម្បត្តិ និងវាយតម្លៃសមាសភាពមន្ត្រី ដែលមានអតីតភាពការងារលើសពី ១០ឆ្នាំ និងមិនធ្លាប់ទទួលបានគ្រឿងឥស្សរិយយស។ សរុបមន្ត្រីដែលទទួលបានមេដាយការងារនៅក្នុងខេត្តកណ្តាល មានចំនួន ៣,០៤៤រូប ខណៈរដ្ឋបាលស្រុកកោះធំ មានចំនួន ១២៨រូប ដែលរួមមាន៖ • មន្ត្រីរាជការរដ្ឋបាលស្រុក ចំនួន ០៤នាក់ (ស្រី ០២នាក់) • គ្រូបង្រៀនបឋមសិក្សា ចំនួន ១១៨នាក់ (ស្រី ៨៥នាក់) • គ្រូបង្រៀនជាប់កិច្ចសន្យា ចំនួន ០៦នាក់ (ស្រី ០២នាក់) ក្នុងឱកាសនោះ ឯកឧត្តម បានផ្តល់អនុសាសន៍ដល់ថ្នាក់ដឹកនាំ និងមន្ត្រីរាជការ ទាំងអស់ ឱ្យបន្តខិតខំបំពេញភារកិច្ចឱ្យកាន់តែមានប្រសិទ្ធភាពខ្ពស់ ដើម្បីគាំទ្រការអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងរួមចំណែកសម្រេចទស្សនវិស័យ ក្នុងការអភិវឌ្ឍខេត្តឱ្យក្លាយជា «ខ្សែក្រវាត់គាំទ្រ សន្តិសុខ សុវត្ថិភាព ឧស្សាហកម្ម ភស្តុភារ ស្បៀង និងលំនៅឋាន»៕