សិក្ខាសាលាបណ្តុះបណ្តាលស្តីពី ការអភិវឌ្ឍប្រព័ន្ធព័ត៌មានដឹកជញ្ជូន និងភស្តុភារកម្ម សម្រាប់ប្រទេសមេគង្គ-ឡានឆាង រាជធានីភ្នំពេញ៖ នាថ្ងៃអង្គារ ទី២៤ ខែមីនា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញជាអធិបតីក្នុងកម្មវិធីបើកសិក្ខាសាលាបណ្តុះបណ្តាលស្តីពី «ការអភិវឌ្ឍ ប្រព័ន្ធព័ត៌មានដឹកជញ្ជូន និងភស្តុភារកម្ម សម្រាប់ប្រទេសមេគង្គ-ឡានឆាង (Training Workshop on Development of Transport and Logistics Information System in Lancang-Mekong Countries)» ក្រោមក្របខណ្ឌមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង (Lancang-Mekong Cooperation Special Fund) ដោយមានការចូលរួមពីមន្ត្រីជំនាញនិងតំណាងមកពី ក្រសួងមហាផ្ទៃ ក្រសួងសាធារណការ និងដឹកជញ្ជូន វិស័យឯកជន និងវិទ្យាស្ថានមេគង្គ ក៏ដូចជាក្រសួង និងស្ថាប័នពាក់ព័ន្ធ និងវិស័យឯកជន មកពីបណ្តាប្រទេសនៃតំបន់មេគង្គ-ឡានឆាង។ សិក្ខាសាលាត្រូវបានរៀបចំឡើងមានរយៈពេល៤ថ្ងៃចាប់ពីថ្ងៃទី២៤ ដល់ ២៧ ខែមីនា ឆ្នាំ២០២៦ ក្នុងគោលបំណងជំរុញការយល់ដឹងអំពីវិស័យភស្តុភារកម្ម ដល់មន្ត្រីជំនាញ និងភាគីពាក់ព័ន្ធ ពិភាក្សា និងស្វែងយល់ពីអំពីតម្រូវការទិន្នន័យ និងកង្វះខាតផ្សេងៗ ដើម្បីប្រមូលធាតុចូលក្នុងការរៀបចំនិងអភិវឌ្ឍ ប្រព័ន្ធព័ត៌មានដឹកជញ្ជូន និងភស្តុភារកម្ម សម្រាប់ប្រើប្រាស់ក្នុងក្របខ័ណ្ឌតំបន់មេគង្គ-ឡានឆាង។ គម្រោង TILS មានកម្មវត្ថុសំខាន់ចំនួន ០៣ គឺ៖ (១). ធ្វើឱ្យប្រសើរឡើងនូវការប្រើប្រាស់ប្រព័ន្ធបច្ចេកវិទ្យា និងប្រព័ន្ធតភ្ជាប់ការដឹកជញ្ជូន និងភស្តុភារកម្ម ក្នុងតំបន់មេគង្គ-ឡានឆាង (២) . អភិវឌ្ឍ និងអនុវត្តការបញ្ចូលគ្នានូវប្រព័ន្ធព័ត៌មានដឹកជញ្ជូន និងភស្តុភារកម្ម ក្នុងតំបនមេគង្គ-ឡានឆាង (៣). ធ្វើឱ្យប្រសើរឡើងនូវកិច្ចសម្រួលពាណិជ្ជកម្ម ការអភិវឌ្ឍ ការវិនិយោគ និងវិស័យទេសចរណ៍ ក្នុងតំបន់មេគង្គ-ឡានឆាង។ ថ្លែងក្នុងកម្មវិធីបើកនៃសិក្ខាសាលា ឯកឧត្តមអនុរដ្ឋលេខាធិការ បានសង្កត់ធ្ងន់ថា TILS គឺជាគម្រោងកម្រិតតំបន់ ដែលចាំបាច់មានការចូលរួមពីបណ្តាប្រទេស មេគង្គ-ឡានឆាង (រួមមាន ប្រទេសកម្ពុជា ចិន ឡាវ ភូមា ថៃ និងវៀតណាម) ទាំងអស់ ដូច្នេះការសហការពីសំណាក់ប្រទេស មេគង្គ-ឡានឆាង គឺជាការចាំបាច់ដើម្បីធានាការអនុវត្តគម្រោងឱ្យទទួលបានជោគជ័យ។ ឯកឧត្តមអនុរដ្ឋលេខាធិការ បានស្នើសុំឱ្យបណ្តាប្រទេស មេគង្គ-ឡានឆាង ចូលរួមសហការយ៉ាងជិតស្និទ្ធក្នុងការអនុវត្តគម្រោង ដើម្បីជាប្រយោជន៍ក្នុងអភិវឌ្ឍន៍វិស័យដឹកជញ្ជូន និងឡូជីស្ទីក នៅក្នុងតំបន់មេគង្គ-ឡានឆាង៕