កិច្ចប្រជុំអន្តរស្ថាប័ន និងកិច្ចប្រជុំលើកទី៨ នៃគណៈកម្មាធិការសម្រាប់គ្រប់គ្រងកិច្ចព្រមព្រៀងសម្បទានគម្រោងផ្លូវល្បឿនលឿនភ្នំពេញ-ក្រុងព្រះសីហនុ ភ្នំពេញ ៖នាព្រឹកថ្ងៃទី១៩ ខែមីនា ឆ្នាំ២០២៦ ឯកឧត្តម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន និងឯកឧត្តម មាស សុខសេនសាន រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ជាសហប្រធាន បានដឹកនាំកិច្ចប្រជុំអន្តរស្ថាប័ន និងកិច្ចប្រជុំលើកទី៨ នៃគណៈកម្មាធិការសម្រាប់គ្រប់គ្រងកិច្ចព្រមព្រៀងសម្បទានគម្រោងផ្លូវល្បឿនលឿនភ្នំពេញ-ក្រុងព្រះសីហនុ ដោយមានការចូលរួមពីឯកឧត្តម លោក ជាអនុប្រធាន និងសមាជិកនៃគណ:កម្មាធិការ ក្រុមការងារអង្គភាពគ្រប់គ្រងគម្រោង ក្រសួងសាធារណការ និងដឹកជញ្ជូន និង សេដ្ឋកិច្ច និងហិរញ្ញវត្ថុ តំណាងថ្នាក់ដឹកនាំអង្គភាពស្ថាប័ន ដូចជាអគ្គនាយកដ្ឋានគយ និងរដ្ឋាករកម្ពុជា អគ្គស្នងការនគរបាលជាតិ រដ្ឋបាលរាជធានី-ខេត្តពាក់ព័ន្ធ បញ្ជាការដ្ឋានកងរាជអាវុធហត្ថខេត្តកំពង់ស្ពឺ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ព្រមទាំងភាគីពាក់ព័ន្ធជាច្រើនរូប។ កិច្ចប្រជុំនេះ រៀបចំឡើងក្នុងគោលបំណងដើម្បីដោះស្រាយបញ្ហាប្រឈមមួយចំនួនជាមួយអាជ្ញាធរមូលដ្ឋានពាក់ព័ន្ធនឹងសន្តិសុខ សុវត្ថិភាព និងសណ្តាប់ធ្នាប់សាធារណៈលើផ្លូវល្បឿនលឿន ការអប់រំផ្សព្វផ្សាយដើម្បីបញ្ជ្រាបចំណេះដឹងពីច្បាប់ចរាចរណ៍ និងការប្រើប្រាស់ផ្លូវឱ្យបើកបរមានការប្រុងប្រយ័ត្ន គោរពតាមគោលការណ៍ណែនាំឱ្យបានត្រឹមត្រូវ ព្រមទាំងការប្រើប្រាស់បច្ចេកវិទ្យា ជួយសម្រួលដល់ការគ្រប់គ្រងប្រតិបត្តិការឱ្យប្រព្រឹត្តទៅដោយរលូន និងជំរុញការបម្រើសេវាផ្លូវល្បឿនលឿនឱ្យកាន់តែមានល្អប្រសើរឡើង។