ភ្នំពេញ ៖ ឯកឧត្តម គួច ប៊ុនលាត រដ្ឋលេខាធិការក្រសួងសាធារណការ និងដឹកជញ្ជូន បានណែនាំដល់មន្ទីរសាធារណការខេត្តកំពង់ធំ ត្រូវបង្កើតក្រុមការងារសន្តិសុខប្រព័ន្ធទឹកកខ្វក់ ដើម្បីធានាការគ្រប់គ្រងឱ្យមានប្រសិទ្ធភាព។ ក្នុងឱកាសចុះពិនិត្យគម្រោងឆ្នាំ២០២៥ សាងសង់បណ្តាញលូលើកំណាត់ផ្លូវជាតិលេខ៦ ក្នុងចន្លោះគីឡូម៉ែត្រ១២៧+៥៧០ ដល់ គីឡូម៉ែត្រ+៤៦០ ប្រវែង ១ ៥៩០ម៉ែត្រ និងដឹកនាំកិច្ចប្រជុំពិនិត្យពិភាក្សាពីស្ថានភាពទូទៅពាក់ព័ន្ធនឹងប្រព័ន្ធទឹកកខ្វក់នៅក្រុងស្ទឹងសែន ខេត្តកំពង់ធំ កាលពីថ្ងៃទី៩ ខែតុលា ឆ្នាំ២០២៥ ឯកឧត្តម គួច ប៊ុនលាត បានផ្តល់អនុសាសន៍ណែនាំដល់មន្ទីរសាធារណការ និងដឹកជញ្ជូនខេត្តកំពង់ធំគិតពិចារណាបង្កើតក្រុមការងារសន្តិសុខប្រព័ន្ធទឹកកខ្វក់ ដោយមានការចូលរួមពីអាជ្ញាធរមូលដ្ឋាននៅតាមទីប្រជុំជន ក្រុង ស្រុក ដើម្បីងាយស្រួលនៅពេលមានបញ្ហាប្រឈមណាមួយពាក់ព័ន្ធនឹងទឹកកខ្វក់ គឺអាចទាក់ទងគ្នាបានឆាប់រហ័ស និងងាយស្រួលក្នុងការស្វែងរកដំណោះស្រាយបានភ្លាមៗជូនដល់ប្រជាពលរដ្ឋ ។ ឯកឧត្តម បានថ្លែងអំណរគុណដល់ឯកឧត្តមអភិបាលខេត្តកំពង់ធំ ដែលបានយកចិត្តទុកដាក់ ក៏ដូចជាគាំទ្រដល់មន្ទីរសាធារណការ និងដឹកជញ្ជូនខេត្តកំពង់ធំ ពាក់ព័ន្ធនឹងវិស័យទឹកកខ្វក់ ជាពិសេសការងារប្រតិបត្តិការ និងថែទាំស្ថានីយប្រព្រឹត្តកម្មទឹកកខ្វក់ ដែលកំពុងស្ថិតក្នុងស្ថានភាពលំបាកដូចជា ការទូទាត់ថ្លៃប្រើប្រាស់ចរន្តអគ្គិសនី និងការចំណាយផ្សេងៗរបស់មន្ទីរ។ សូមជម្រាបថា កិច្ចប្រជុំមានគោលបំណងសំខាន់ដើម្បីពិនិត្យពិភាក្សាពីកិច្ចដំណើរការនៃប្រតិបត្តិការ និងការថែទាំស្ថានីយប្រព្រឹត្តកម្មទឹកកខ្វក់នៅក្នុងក្រុងស្ទឹងសែន និងស្ថានភាពបច្ចុប្បន្ននៃប្រព័ន្ធទឹកកខ្វក់នៅតាមតំបន់នានា ដើម្បីកំណត់វិធានការសមរម្យណាមួយ សម្រាប់ការគ្រប់គ្រង និងអភិវឌ្ឍប្រព័ន្ធទឹកកខ្វក់ឱ្យមានប្រសិទ្ធភាពកាន់តែល្អប្រសើរប្រកបដោយចីរភាព និងនិរន្តរ៍ភាព៕