ខេត្តព្រះសីហនុដែលជាខេត្តស្ថិតនៅតំបន់ឆ្នេរ មានស្ថានីយប្រព្រឹត្តកម្មទឹកកខ្វក់ចំនួន ៤ កន្លែង ដែលមានសមត្ថភាពអាចចម្រោះទឹកកខ្វក់បាន ៦២ ៤០០ ម៉ែត្រគូប ក្នុង ១ ថ្ងៃ។ នេះបើតាមការឲ្យដឹងពីលោក ឡុង ឌីម៉ង់ អភិបាលរងខេត្តព្រះសីហនុប្រាប់កម្ពុជាថ្មី។ស្ថានីយទី ១ មានសមត្ថភាពប្រព្រឹត្តកម្មទឹកកខ្វក់បានប្រមាណ ៥ ២០០ ម៉ែត្រគូប ក្នុង ១ ថ្ងៃ។ ស្ថានីយទី២ មានសមត្ថភាពប្រព្រឹត្តកម្មទឹកកខ្វក់ប្រមាណ ៧ ២០០ ម៉ែត្រគូប ក្នុង១ថ្ងៃ។ ស្ថានីយទី ៣ មានសមត្ថភាពប្រព្រឹត្តកម្មទឹកកខ្វក់ប្រមាណ ២០ ០០០ ម៉ែត្រគូប ក្នុង១ថ្ងៃ និងស្ថានីយច្រោះសម្អាតទឹកកខ្វក់អូរឈើទាល ដែលអភិវឌ្ឍលើផ្ទៃដីទំហំ ១៦ ហិកតា មានសមត្ថភាពច្រោះទឹកកខ្វក់បាន ៣០ ០០០ ម៉ែត្រគូប/ក្នុងមួយថ្ងៃ។បើតាមលោក ឡុង ឌីម៉ង់ ស្ថានីយប្រព្រឹត្តកម្មចម្រោះទឹកកខ្វក់ទាំង ៤ គ្រប់ដណ្តប់បានប្រមាណជា ៧០% ដែលបានបំពេញតួនាទីបន្សុទ្ធទឹកកខ្វក់ឱ្យក្លាយជាទឹកស្អាតស្របតាមស្តង់ដារបរិស្ថាន មុននឹងបញ្ចេញចោលទៅសមុទ្រ។បន្ថែមពីនេះ មន្រ្តីអ្នកនាំពាក្យរដ្ឋបាលខេត្តព្រះសីហុនបានឲ្យដឹងថា ខេត្តក្នុងតំបន់ឆ្នេរមួយនេះក៏មានស្ថានីយបូមទឹកកង្វក់ចំនួន ៨ កន្លែង ដែលមានសមត្ថភាពបូមបានចំនួន ៤៤ ០៦៤ ម៉ែត្រគូប ក្នុង១ថ្ងៃ និងកំពុងដំណើរការសាងសង់ស្ថានីយបូមទឹកកខ្វក់ចំនួន ២ ទីតាំងបន្ថែមទៀត៕