កិច្ចប្រជុំពិភាក្សាទៅលើបញ្ជីអាទិភាពគម្រោង ដែលបានជ្រើសរើសសម្រាប់ផែនការវិនិយោគសាធាណៈ ឆ្នាំ២០២៦ ដោយប្រើថវិកាជំពូក២១ និងជំពូក៦១ ទីស្ដីការក្រសួង៖ នាថ្ងៃពុធ ទី៣ ខែកញ្ញា ឆ្នាំ២០២៥ ឯកឧត្ដម ឡាវ វ៉ាន់ រដ្ឋលេខាធិការ និងជាសហប្រធានគណៈកម្មការអន្តរក្រសួងដឹកនាំសម្របសម្រួលគ្រប់គ្រងគម្រោងវិនិយោគសាធារណៈ និងថែទាំហេដ្ឋារចនាសម្ព័ន្ធ ហិរញ្ញប្បទានដោយថវិកាថ្នាក់ជាតិ និងឯកឧត្តម យិត បុណ្ណា រដ្ឋលេខាធិការ និងជាអនុប្រធានប្រចាំការ នៃគណៈកម្មាធិការអន្តរក្រសួងដឹកនាំសម្របសម្រួលគ្រប់គ្រងគម្រោងវិនិយោគសាធារណៈ និងកម្មវិធីថែទាំហេដ្ឋារចនាសម្ព័ន្ធ ហិរញ្ញប្បទានដោយថវិកាថ្នាក់ជាតិ បានអញ្ជើញជាសហប្រធានដឹកនាំកិច្ចប្រជុំពិនិត្យទៅលើបញ្ជីអាទិភាពគម្រោង ដែលបានជ្រើសរើសសម្រាប់ផែនការវិនិយោគសាធាណៈ ឆ្នាំ២០២៦ ដោយប្រើថវិកាជំពូក២១ និងជំពូក៦១ ដើម្បីជ្រើសរើស និងកំណត់អាទិភាពក្នុងគោលដៅស្តារ និងអភិវឌ្ឍន៍ហេដ្ឋារចនាសម្ព័ន្ធចាំបាច់នានា ដោយមានការអញ្ជើញចូលរួមពី ឯកឧត្ដមអនុរដ្ឋលេខាធិការ ឯកឧត្ដមទីប្រឹក្សាក្រសួង ឯកឧត្ដមអគ្គនាយក លោកអគ្គនាយករង ប្រធាននាយកដ្ឋាន និងមន្រ្តីបច្ចេកទេសក្រោមឱវាទក្រសួង។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យអាទិភាពក្នុងការបង្ហាញទិន្នន័យ អំពីគម្រោងវិនិយោគសាធារណៈ ដែលមានអាទិភាពខ្ពស់របស់ក្រសួង ដោយប្រើថវិកាជំពូក២១ និងជំពូក៦១ សម្រាប់អនុវត្តគម្រោងធ្វើការថែទាំ ជួសជុល ស្ថាបនា និងស្ដារឡើងវិញ លើហេដ្ឋារចនាសម្ព័ន្ធផ្លូវថ្នល់ ស្ពាន ទូទាំងប្រទេសសម្រាប់ឆ្នាំ២០២៦ ដើម្បីបម្រើដល់ការដឹកជញ្ជូនប្រកបដោយប្រសិទ្ធិភាព បម្រើដល់សេដ្ឋកិច្ច និងសង្គមស្របទៅតាមផែនការយុទ្ធសាស្រ្ដរបស់រាជរដ្ឋាភិបាល៕