ពិធីបិទវគ្គអប់រំនយោបាយរបស់គណបក្សខេត្ត ជំនាន់ទី៣៦ សម្រាប់មន្ត្រីគណបក្សការិយាល័យ អង្គភាពជុំវិញស្រុកកោះធំ ចាប់ពីថ្ងៃទី០៥ ដល់ថ្ងៃទី០៧ ខែសីហា ឆ្នាំ២០២៥ ស្រុកកោះធំ៖ នាថ្ងៃព្រហស្បតិ៍ ទី៧ ខែសីហា ឆ្នាំ២០២៥ ឯកឧត្តម តាំង សាមឿន សមាជិកក្រុមការងារគណបក្សចុះមូលដ្ឋានខេត្តកណ្តាល តំណាងដ៏ខ្ពង់ខ្ពស់ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកកោះធំ អញ្ជើញជាអធិបតីក្នុងពិធីបិទវគ្គអប់រំនយោបាយរបស់គណបក្សខេត្ត ជំនាន់ទី៣៦ សម្រាប់មន្ត្រីគណបក្សការិយាល័យ អង្គភាពជុំវិញស្រុកកោះធំ ចាប់ពីថ្ងៃទី០៥ ដល់ថ្ងៃទី០៧ ខែសីហា ឆ្នាំ២០២៥ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ក្រុមការងារគណបក្សចុះមូលដ្ឋានស្រុកកោះធំ គ្រូឧទ្ទេស និងគ្រូជំនួយគណបក្សខេត្តសមាជិកអចិន្ត្រៃយ៍នៃគណបក្សស្រុក គណៈគ្រប់គ្រងវគ្គ និងសិក្ខាកាមជាច្រើនរូប នៅស្នាក់ការគណបក្សស្រុកកោះធំ។ ឯកឧត្តមសមាជិកក្រុមការងារគណបក្សចុះមូលដ្ឋាន បានវាយតម្លៃខ្ពស់ចំពោះលទ្ធផលដ៏ល្អប្រសើរប្រកបដោយផ្លែផ្កា ដែលសិក្ខាកាមទាំង៩៧នាក់សម្រេចបាន និងសូមសម្តែងនូវការកោតសរសើរ ចំពោះគណៈគ្រប់គ្រងវគ្គ គ្រូឧទ្ទេស និងគ្រូជំនួយ ដែលបានខិតខំធ្វើការពន្យល់ និងណែនាំជូនដល់សិក្ខាកាម ប្រកបដោយជំនាញ ទេពកោសល្យ បទពិសោធន៍ ព្រមទាំងគួបផ្សំជាមួយវិធីសាស្ត្រ បង្រៀនដ៏ល្អ និងមានប្រសិទ្ធភាពខ្ពស់។ ក្នុងឱកាសនោះដែរ ឯកឧត្តម បានផ្តល់នូវអនុសាសន៍មួយចំនួនដល់សិក្ខាកាម ដើម្បីពិនិត្យពិចារណា និងធ្វើការច្នៃប្រឌិតបន្ថែម សម្រាប់ការអនុវត្តរាល់ភារកិច្ច ដើម្បីទទួលបាននូវប្រសិទ្ធភាពកាន់តែប្រសើរ និងស្របតាមលក្ខណៈជាក់ស្តែង នៃគណៈកម្មាធិការគណបក្សមូលដ្ឋាន សាខាបក្សអង្គភាពនីមួយៗរបស់ខ្លួន។ ទន្ទឹមនេះ ឯកឧត្តម ក៏បានលើកទឹកចិត្តដល់សិក្ខាកាមគ្រប់រូប ក៏ដូចសមាជិកគណបក្សទាំងអស់ សូមបន្តរួមសាមគ្គីគ្នាជាធ្លុងមួយ និងត្រូវមានភាពជឿជាក់ និងគាំទ្រយ៉ាងស្មោះស្ម័គ្រចំពោះថ្នាក់ដឹកនាំរបស់គណបក្ស ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្ស និង សម្តេចមហាបវរ ធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រី នៃរាជរដ្ឋាភិបាល សម្រាប់នីតិកាលទី៧ នៃរដ្ឋសភា ដែលសម្តេចទាំងពីរបានបន្តការពារ កសាង និងការអភិវឌ្ឍប្រទេសកម្ពុជាយើង ប្រកបដោយភាពជឿនលឿន ក្រោមម្លប់នយោបាយសន្តិភាព និងស្ថិរភាពនៃសង្គមសេដ្ឋកិច្ចជាតិនៃយើងទាំងអស់គ្នា៕