ខេត្តក្រចេះ គ្រោងនឹងបង្កើតកំពង់ផែពហុបំណងក្រចេះ, កំពង់ផែ ទេសចរណ៍ក្រចេះ, កំពង់ផែពហុបំណងដោះដូរទំនិញ និងគម្រោងកែលម្អផ្លូវនាវាចរណ៍ទន្លេមេគង្គកំពង់ចាម-ក្រចេះ ដើម្បីជំរុញការវិនិយោគក្នុងខេត្តចំនួន ៤ នៅភូមិភាគឦសាននៃព្រះរាជាណាចក្រកម្ពុជា។ នេះបើតាមការឱ្យដឹងពីលោក ទុយ ប៊ុនសេរីរត្ន័មុនី អភិបាលរងខេត្តក្រចេះ។ពាក់ព័ន្ធនឹងគម្រោងបង្កើតកំពង់ផែពហុបំណងក្នុងខេត្តក្រចេះ លោក អ៊ូ សុបុណ្ណការ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះបានឱ្យដឹងថា អាជ្ញាធរខេត្តកំពុងសិក្សាទីតាំងភូមិសាស្ត្រចំនួន ៣។ ទីតាំងទី១ នៅមុខសណ្ឋាគារ សន្តិភាព ក្នុងក្រុងក្រចេះ, ទីតាំងទី២- នៅស្រុកចិត្របុរី និងទីតាំងទី៣- នៅស្រុកឆ្លូង ហើយការសិក្សានេះ គឺពឹងផ្អែកទៅលើលទ្ធភាពថាទីតាំងណាអាចធ្វើទៅបាន។លោក សៀន គិន អនុប្រធានមន្ទីរកសិកម្មរុក្ខាប្រមាញ់ និងនេសាទខេត្តក្រចេះបានបញ្ជាក់ថា តាមរយៈគម្រោងអភិវឌ្ឍកំពង់ផែពហុបំណង កំពង់ផែទេសចរក្រចេះ បន្ថែមជាមួយការកសាងស្ពានឆ្លងកាត់ទន្លេមេគង្គក្រចេះ និងប្រពន្ធ័ហេដ្ឋារចនាសម្ពន្ធ័គមនាគមន៍ ទីតាំងកសិ-ឧស្សាហកម្ម នឹងជួយបង្កើនសក្តានុពលនិងជំរុញការអភិវឌ្ឍសេដ្ឋកិច្ចដល់ខេត្តក្រចេះ និងខេត្តភូមិភាគឦសានបន្ថែមទៀត៕