ប្រជុំអនុគណៈកម្មការឯកសារ និងបូកសរុប សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ទីស្តីការក្រសួង៖ នៅថ្ងៃសុក្រ ទី២០ ខែធ្នូ ឆ្នាំ២០២៤ ឯកឧត្តម វ៉ាស៊ឹម សុរិយា អនុរដ្ឋលេខាធិការ និងជាប្រធានអនុគណៈកម្មការឯកសារ និងបូកសរុប បានអញ្ជើញដឹកនាំកិច្ចប្រជុំអនុគណៈកម្មការឯកសារ និងបូកសរុប សម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ដោយមានវត្តមានចូលរួមពី ឯកឧត្តមអគ្គនាយក និងលោក លោកស្រីជាថ្នាក់ដឹកនាំ អញ្ជើញមកពីគ្រប់អង្គភាពក្រោមឱវាទក្រសួង និងមន្ទីរសាធារណការ និងដឹកជញ្ជូន រាជធានីខេត្ត។ កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ និងសម្រេចលើសេចក្តីព្រាងរបាយការណ៍សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួង ដែលគ្រោងរៀបចំនាពេលខាងមុខ។ ជាលទ្ធផល អង្គប្រជុំបានពិនិត្យ និងផ្តល់យោបល់លើសេចក្តីព្រាងចំពោះខ្លឹមសារខាងលើនេះ និងបានកែសម្រួលនូវចំណុចខ្វះខាតមួយចំនួន ព្រមទាំងទុកពេលវេលាឱ្យគ្រប់អង្គភាពពិនិត្យ និងផ្តល់យោបល់បន្ថែម ត្រឹមថ្ងៃចន្ទ ទី២៣ ខែធ្នូ ឆ្នាំ២០២៤ ដើម្បីឱ្យក្រុមការងារយកទៅកែសម្រួលកាន់តែល្អប្រសើរ និងគ្រប់ជ្រុងជ្រោយ។ ទន្ទឹមនោះ ឯកឧត្តមប្រធានអង្គប្រជុំ បានឯកភាពនូវជម្រើសក្របសៀវភៅចំនួន ៣ប្រភេទ សម្រាប់ស្នើសុំការពិនិត្យ និងសម្រេចពី លោកជំទាវរដ្ឋលេខាធិការប្រចាំការ និងជាប្រធានគណៈកម្មការរៀបចំសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube