ទស្សនកិច្ចសិក្សា ស្តីពីការផ្លាស់ប្តូរចំណេះដឹងអំពីវិស័យទឹកកខ្វក់ កម្ពុជា-អូស្ត្រាលី របស់សមាគមទឹកអូស្ត្រាលី (AWA-P4I) ដើម្បីសិក្សាស្វែងយល់ និងចែករំលែកបទពិសោធន៍ អំពីការងារប្រតិបត្តិការ និងថែទាំប្រព័ន្ធប្រព្រឹត្តកម្មទឹកកខ្វក់ ក្នុងប្រទេសកម្ពុជា។ កម្មវិធីទស្សនកិច្ចសិក្សាកាលពីថ្ងៃទី២៧ ដល់ថ្ងៃទី៣០ ខែសីហា ឆ្នាំ២០២៤ ដឹកនាំដោយ ឯកឧត្តម ចៅសុភៈភិបាល អគ្គនាយកប្រព័ន្ធចម្រោះទឹកកខ្វក់ ព្រមទាំងមានការចូលរួមពី ប្រធានមន្ទីរ អនុប្រធានមន្ទីរ និងមន្ត្រីបច្ចេកទេស ក្រសួងសាធារណការ និងដឹកជញ្ជូន សិក្សាស្វែងយល់តាមបណ្តាស្ថានីយចម្រោះទឹកកខ្វក់ និងស្ថានីយបូមទឹក នៅកម្ពុជា ជាមួយតំណាងដៃគូអភិវឌ្ឍ AWA-P4I (Australian Water Association, Partnership for Infrastructure) របស់ប្រទេសអូស្រ្តាលី។ គោលបំណងនៃដំណើរទស្សនកិច្ចសិក្សានេះគឺ ដើម្បីចែករំលែកបទពិសោធន៍ អំពីគោលនយោបាយ យុទ្ធសាស្រ្តក្នុងការអនុវត្ត ការគ្រប់គ្រងទឹក និងរឹតបន្តឹងភាពជាដៃគូជាមួយប្រទេសអូស្រ្តាលីលើវិស័យគ្រប់គ្រងទឹកកខ្វក់ ព្រមទាំងសិក្សាស្វែងយល់បន្ថែមអំពីបច្ចុប្បន្នភាពវិស័យទឹកស្អាត និងអនាម័យ។ ដំណេីរទស្សនកិច្ចសិក្សា នេះបានធ្វើឡើងនៅ ទីតាំងស្ថានីយប្រព្រឹត្តកម្មសំណល់រាវ ក្រុងស្ទឹងសែន ខេត្តកំពង់ធំ ស្ថានីយចម្រោះទឹកកខ្វក់ក្រុងសៀមរាប និងស្ថានីយបូមទឹកសាលាកន្សែង ក្រុងសៀមរាប ខេត្តសៀមរាប ស្ថានីយច្រោះសំអាតទឹកកាកសំណល់ក្រុងព្រះសីហនុ និងស្ថានីយបូមទឹកកខ្វក់ ខេត្តព្រះសីហនុ ស្ថានីយបូមទឹកកខ្វក់ព្រែកចាក និងស្ថានីយប្រព្រឹត្តកម្មទឹកកខ្វក់ក្រុងកំពត។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube