កិច្ចប្រជុំអន្តរក្រសួង ស្ថាប័ន ពិនិត្យពិភាក្សាលើសេចក្តីព្រាងច្បាប់ស្តីពី “ប្រព័ន្ធទឹកកខ្វក់” ដើម្បីធ្វើយ៉ាងណាឱ្យច្បាប់នេះកាន់តែមានវិសាលភាព ប្រកបដោយសង្គតិភាព គណៈរដ្ឋមន្ត្រី៖ ថ្ងៃទី២៩-៣០ ខែមេសា ឆ្នាំ២០២៣ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងអញ្ជើញចូលរួមកិច្ចប្រជុំ អន្តរក្រសួង ស្ថាប័ន ពិនិត្យពិភាក្សាលើសេចក្តីព្រាងច្បាប់ស្តីពី “ប្រព័ន្ធទឹកកខ្វក់” នៅទីស្ដីការគណៈរដ្ឋមន្ត្រី ក្រោមអធិបតីភាព ឯកឧត្ដម ឆឺយ រឿន រដ្ឋលេខាធិការទីស្តីការគណៈរដ្ឋមន្រ្តី។ ដោយកិច្ចប្រជុំនេះមានការអញ្ជើញចូលរួម ពីថ្នាក់ដឹកនាំ អនុរដ្ឋលេខាធិការ អគ្គនាយកនៃអគ្គនាយកដ្ឋានប្រព័ន្ធទឹកកខ្វក់ មន្ត្រីជំនាញក្រោមឱវាទ និង ឯកឧត្តម លោកជំទាវ តំណាងគ្រប់ក្រសួង ស្ថាប័ន សមត្ថកិច្ចពាក់ព័ន្ធ ជាមួយសេចក្តីព្រាងច្បាប់នេះ ចូលរួមផងដែរ។ ជាលទ្ធផលនៃកិច្ចប្រជុំអង្គប្រជុំបានឯកភាពលើការកែសម្រួលទម្រង់ ខ្លឹមសារ និងពាក្យពេចន៍ អក្ខរាវិរុទ្ធមួយចំនួន ព្រមទាំងទទួលបានធាតុចូលជាលាយលក្ខណ៍អក្សរបន្ថែមជាច្រើនពីអង្គប្រជុំ ដើម្បីឱ្យច្បាប់នេះកាន់តែមានវិសាលភាព ប្រកបដោយសង្គតិភាពច្បាស់លាស់។ ក្នុងនោះដែរអង្គប្រជុំបានឯកភាពនូវសំណើរបស់តំណាងក្រសួងមហាផ្ទៃ លើខ្លឹមសារមាត្រា៤៥ មាត្រា៧៣ និងមាត្រា៨៣ នៃសេចក្តីព្រាងច្បាប់នេះ។ នៅពេលបន្ទាប់ក្នុងនាមក្រសួងសាមី និងត្រូវធ្វើការសហការជាមួយក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ពិនិត្យលើ ជំពូកស្តីពីទោសប្បញ្ញត្តិ ពិនិត្យពិភាក្សាសម្រេចចុងក្រោយលើការបន្ថែមធាតុចូលថែមទៀត មុននឹងបញ្ជូនទៅក្រសួងយុត្តិធម៌ ឱ្យដឹកនាំការពិភាក្សាបន្តលម្អិតលើទោសប្បញ្ញត្តិ ហើយត្រូវមានការចូលរួមពីក្រសួងសាធារណការនិងដឹកជញ្ចូន រួមជាមួយអង្គភាពប្រឆាំងអំពើពុករលួយ ដើម្បីបន្តកិច្ចប្រជុំពិភាក្សានាពេលក្រោយទៀត៕