ភ្នំពេញៈ លោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីដើមសប្ដាហ៍បានណែនាំដល់ថ្នាក់ដឹកនាំអាជ្ញាធរខេត្ត-រាជធានី សហការជាមួយក្រសួងសាធារណការ និងដឹកជញ្ជូន ទប់ស្កាត់សកម្មភាពរាំលេងយ៉ាងអនាធិបតេយ្យតាមចង្វាក់ភ្លេងស៊ីផ្លេរថយន្តធុនធំដែលកំពុងបើកបរនៅលើដងផ្លូវដែលធ្វើឱ្យប៉ះពាល់សណ្ដាប់ធ្នាប់ អាចនឹងបង្កហានិភ័យគ្រោះថ្នាក់នៅលើដងផ្លូវ។ នេះបើយោងតាមសាររបស់នាយករដ្ឋមន្ត្រីដែលត្រូវបានផ្សព្វផ្សាយតាមបណ្ដាញសង្គមនានា។សារណែនាំរបស់លោកនាយករដ្ឋមន្ត្រី បានធ្វើឡើងបន្ទាប់ពីមានសកម្មភាពនាពេលថ្មីៗកន្លងមកនេះដោយមានក្រុមយុវជនរាំលេងនៅលើចិញ្ចើមផ្លូវនៅពេលដែលមានរថយន្តធុនធំឆ្លងកាត់ដោយបញ្ចេញស៊ីផ្លេដែលមានសំឡេងជាចង្វាក់ភ្លេង។យោងតាមសាររបស់លោកនាយករដ្ឋមន្ត្រីបានបញ្ជាក់ថា៖ «ដើម្បីឱ្យការអនុវត្តវិធានការនេះកាន់តែមានប្រសិទ្ធភាពនិងកាន់តែទូលំទូលាយ ខ្ញុំសូមណែនាំដល់ក្រសួងសាធារណការ និងដឹកជញ្ជូន អគ្គស្នងការដ្ឋាននគរបាលជាតិ អាជ្ញាធររាជធានី-ខេត្ត និងស្នងការដ្ឋាននគរបាលរាជធានី-ខេត្ត ធ្វើការសហការគ្នា ត្រួតពិនិត្យ និងធ្វើការណែនាំពាក់ព័ន្ធនឹងលក្ខណៈបច្ចេកទេសស៊ីផ្លេរថយន្ត ដើម្បីទប់ស្កាត់ភាពអនាធិបតេយ្យតាមដងផ្លូវសាធារណៈ»។សារដដែលនេះបានឱ្យដឹងទៀតថា កម្លាំងសមត្ថកិច្ចតាមបណ្តាខេត្តមួយចំនួនបានចាត់វិធានការ ដោយណែនាំឱ្យអ្នកបើកបររថយន្តធំដោះស៊ីផ្លេដែលបំពាក់ខុសលក្ខណៈបច្ចេកទេសចេញ និងផ្លាស់ប្តូរស៊ីផ្លេឱ្យបានត្រឹមត្រូវឡើងវិញ ប៉ុន្តែវិធានការនេះ ហាក់នៅមិនទាន់គ្រប់គ្រាន់នៅឡើយទេ។លោក ហ៊ុន ម៉ាណែត បានបន្តថា៖ «(ដូច្នេះ) ខ្ញុំសូមប្រគល់ភារកិច្ចជូនគណៈបញ្ជាការឯកភាពរដ្ឋបាល រាជធានី ខេត្ត ក្រុង ស្រុក ខណ្ឌ ធ្វើការណែនាំ និងចាត់វិធានការឱ្យបានតឹងរ៉ឹង ដើម្បីទប់ស្កាត់សកម្មភាពអនាធិបតេយ្យដែលប៉ះពាល់ដល់សណ្តាប់ធ្នាប់នៅតាមដងផ្លូវសាធារណៈ និងអាចបង្កឱ្យមានគ្រោះថ្នាក់ដល់អាយុជីវិតប្រជាពលរដ្ឋ»។ ជាមួយគ្នានេះលោកនាយករដ្ឋមន្ត្រី ក៏បានអំពាវនាវដល់ក្រុមហ៊ុនដឹកជញ្ជូន ព្រមទាំងអ្នកបើកបររថយន្តធំៗ ត្រូវដាក់ស៊ីផ្លេឱ្យបានត្រឹមត្រូវតាមលក្ខណៈ បច្ចេកទេសដែលក្រសួងសាធារណការ និងដឹកជញ្ជូន បានណែនាំ និងចៀសវាងការប្រើប្រាស់ស៊ីផ្លេដែលនាំឱ្យមានការលើកទឹកចិត្តដល់ប្រជាពលរដ្ឋ ជាពិសេសក្មេងៗ និងយុវវ័យ ធ្វើសកម្មភាពរាំលេងតាមដងផ្លូវ។ លោកបានបន្ថែមថា៖ «ខ្ញុំសូមអំពាវនាវដល់ប្រជាពលរដ្ឋ ជាពិសេសក្មួយៗ សូមបញ្ឈប់សកម្មភាពរាំលេងតាមដងផ្លូវតាមចង្វាក់ស៊ីផ្លេភ្លេងរបស់រថយន្តធំៗ ចៀសវាងគ្រោះថ្នាក់ និងបង្កភាពអនាធិបតេយ្យតាមដងផ្លូវ ហើយក៏សូមអាណាព្យាបាលចូលរួមសហការ និងធ្វើការណែនាំដល់ក្មួយៗឱ្យបញ្ឈប់សកម្មភាពរាំលេងតាមដងផ្លូវ»។ លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ នៅថ្ងៃទី ១៨ ខែមីនា បានថ្លែងថា មូលដ្ឋានរាជធានីភ្នំពេញមិនទាន់បានអនុវត្តនៅឡើយទេ ដោយរង់ចាំដាក់ចេញបទបញ្ជា និងផែនការច្បាស់លាស់ពីថ្នាក់ដឹកនាំសិន ខណៈនៅតាមបណ្តាខេត្តមួយចំនួន បានអនុវត្តទប់ស្កាត់ និងបង្ក្រាបជាបណ្តើរៗរួចហើយ។ កម្លាំងអន្តរាគមន៍នគរបាលចរាចរណ៍ខេត្តកំពង់ស្ពឺ កាលពីថ្ងៃទី ១៤ ខែមីនា បានសហការអនុវត្តពង្រឹងច្បាប់ចរាចរណ៍ផ្លូវគោកដោយបានដកហូតគ្រឿងបំពាក់លើរថយន្ដចំនួន ៨ គ្រឿង ដែលបានបំពាក់ឧបករណ៍បំពងសំឡេង (ស៊ីផ្លេខ្យល់) បន្ថែមពីលើការកំណត់លក្ខណៈយានយន្ដ។ ជាមួយគ្នានេះ ស្នងការដ្ឋាននគរបាលខេត្តកំពង់ស្ពឺ បានអំពាវនាវដល់ម្ចាស់អាជីវកម្មរថយន្តដឹកជញ្ជូនទាំងអស់ ត្រូវចូលរួមអនុវត្តតាមច្បាប់ ចៀសវាងការដកហូតនិងអនុវត្ដផ្លូវច្បាប់នាំឱ្យមានការខាតបង់ប្រាក់និងពេលវេលា។ លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានថ្លែងថា នៅក្នុងសាលារៀនមានកម្មវិធីសិក្សាអប់រំផ្នែកសីលធម៌ ប៉ុន្តែក្រុមក្មេងឬយុវជនមួយចំនួនគេមិនបានចូលរៀនដែលបញ្ហានេះជាកំហុសមិនប្រក្រតីខ្លះនៅក្នុងវិស័យអប់រំ។ លោក យង់ ពៅ បញ្ជាក់ទៀតថា៖ «(សកម្មភាពដែល) មិនបានគិត ឬមិនបានដឹង (វាធ្វើឱ្យ) ប៉ះពាល់ដល់សីលធម៌ និងសណ្តាប់ធ្នាប់សង្គម»។ លោកអគ្គលេខាធិការនៃរាជបណ្ឌិត្យសភាកម្ពុជាបានថ្លែងបន្តទៀតថា៖ «សម្តេចនាយករដ្ឋមន្ត្រីបានចេញសារហើយ គឺវា (បង្ហាញពីភាព) គ្រោះថ្នាក់ខ្លាំងណាស់ផ្លូវនៅស្រុកយើង បើសិនជាបណ្តែតបណ្តោយទៀត ក្មេងៗធ្វើទូទាំងប្រទេស រហូតដល់ពេលចូលឆ្នាំ គឺគ្រោះថ្នាក់តែម្តង អ៊ីចឹងទេ យើងត្រូវទប់ស្កាត់ឱ្យបាន»៕