ជូនពរដល់បេក្ខជនទាំងអស់ ទទួលបានជោគជ័យ ក្នុងការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារក្នុងក្របខណ្ឌក្រសួងសាធារណការ និងដឹកជញ្ជូន ឆ្នាំ២០២៣ សម័យប្រឡងថ្ងៃទី០៤ ខែមីនា ឆ្នាំ២០២៤! មណ្ឌលប្រឡងសាលាភូមិន្ទរដ្ឋបាល៖ នាព្រឹកថ្ងៃចន្ទ ទី០៤ ខែមីនា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានគណៈមេប្រយោគ បានអញ្ជេីញអមដំណេីរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ប្រធានគណៈមេប្រយោគ ក្នុងដំណើរការប្រឡងប្រជែងរើសរើសមន្ត្រីរាជការ ឱ្យចូលបម្រើការងារ ក្នុងក្របខណ្ឌក្រសួងសាធារណការ និងដឹកជញ្ជូន សម័យប្រឡង០៤ មីនា ២០២៤។ ដំណើរការប្រឡងនេះ មានការចូលរួម ពី ថ្នាក់ដឹកនាំ និងមន្ត្រីជំនាញក្រសួងមុខងារសាធារណៈ និងក្រសួងសាធារណការ និងដឹកជញ្ជូន តំណាងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពប្រឆាំងអំពើពុករលួយ តំណាងសាកលវិទ្យាល័យនានា រួមទាំងមហាជនស្ម័គ្រចិត្តចុះឈ្មោះជាអ្នកសង្កេតការណ៍ ព្រមទាំងតំណាងសហភាពសហព័ន្ធយុវជនកម្ពុជា (ស.ស.យ.ក.)។ សូមជម្រាបជូនថា តាំងពីវេលាព្រឹកព្រលឹម គណៈមេប្រយោគ សម្រាប់ការប្រឡងប្រជែង បានចាប់ផ្តើមតាក់តែងវិញ្ញាសាសរសេរ។ ក្រោយពីរៀបចំវិញ្ញាសារួចរាល់ ឯកឧត្តមឧបនាយករដ្ឋមន្ត្រី ហ៊ុន ម៉ានី និងឯកឧត្តរដ្ឋមន្ត្រី ប៉េង ពោធិ៍នា បានអញ្ជើញ ជ្រើសរើស និងបើកវិញ្ញាសា សម្រាប់បេក្ខជនចាប់ផ្តើមដំណើរការប្រឡង។ ការប្រឡងនេះ ត្រូវបានអនុវត្តទៅតាមនិយាមនីតិវិធីប្រតិបត្តិនៃការប្រឡង ដោយមានការរៀបចំតាក់តែងវិញ្ញាសានៅពេលព្រឹក និងប្រឡងនៅពេលរសៀល ចាប់ពីម៉ោង ១២ និង៣០នាទី រហូតដល់ម៉ោង ១៧ និង៣០នាទី ល្ងាច ដោយមានបេក្ខជនចូលរួមចំនួន ១៤២៤ អង្គ/នាក់ (ស្រី ៥៣៨ នាក់) មកពីបណ្តារាជធានី-ខេត្ត ទូទាំងប្រទេស។ ការប្រឡង កំពុងត្រូវបានប្រព្រឹត្តទៅ លើវិញ្ញាសាចំនួន៣ប្រភេទ រួមមាន៖ ១.វិញ្ញាសាវប្បធម៌ទូទៅ ២.វិញ្ញាសាជំនាញ និង ៣.វិញ្ញាសាភាសាអង់គ្លេស។ ការអនុវត្តនីតិវិធីប្រតិបត្តិនៃការប្រឡងបែបនេះ គឺដើម្បីរក្សានូវតម្លាភាព និងយុត្តិធម៌ ធានាបានថាអ្នកចេះគឺជាប់ ហើយអ្នកជាប់គឺជាប់ដោយសមត្ថភាព និងប្រកបដោយកិត្តិយស។ ក្នុងនាមក្រសួងសាធារណការ និងដឹកជញ្ជូន សូមជូនពរដល់បេក្ខជនទាំងអស់ ទទួលបានជោគជ័យ ក្នុងការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារក្នុងក្របខណ្ឌក្រសួងសាធារណការ និងដឹកជញ្ជូន ឆ្នាំ២០២៣ សម័យប្រឡងថ្ងៃទី០៤ ខែមីនា ឆ្នាំ២០២៤៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube