កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម គ្រោងស្ថាបនាផ្លូវកៅស៊ូ ប្រភេទ DBST ដើម្បីតភ្ជាប់ឃុំអារក្សត្នោត និងឃុំទួលសំបួរ ស្រុកស្ទឹងត្រង់ ប្រវែងជាង ១០ គីឡូម៉ែត្រ គឺឱ្យមន្រ្តីជំនាញចុះសិក្សាជាបន្ទាន់ លើកគម្រោងស្នើទៅកាន់ ក្រសួងសាធារណការ និងដឹកជញ្ជួន ឱ្យបានមុនការបោះឆ្នោត ជ្រើសតាំងតំណាងរាស្រ្ត នីតិកាលទី៧ នៅថ្ងៃទី២៣ កក្កដា មកដល់ ។​ នេះបើតាម ការឱ្យដឹងពីលោក ប្រាក់ ទិត្យ នាយកទីចាត់ការផែនការ វិនិយោគ សាលាខេត្តកំពង់ចាម នៅថ្ងៃទី១៩ កក្កដា នេះ។ លោកនាយកទីចាត់ការផែនការ វិនិយោគ សាលាខេត្តកំពង់ចាម បានឱ្យដឹងទៀតថាៈ លោកអភិបាលកំពង់ចាម បានប្រកាសឱ្យដឹងពី គម្រោងសាងសង់ជាប្រភេទ DBST ខាងលើ ខណៈដែលលោក និងសហការី បានដឹកនាំមន្រ្តី នៃមន្ទីរអង្គភាពពាក់ព័ន្ធ ចុះពង្រឹងការងារសន្តិសុខ និងការពង្រឹងគុណភាពសេវាសាធារណៈ តាមបណ្តាឃុំចំនួន ប្រាំៈ ឃុំអារក្សត្នោត,ឃុំទួលសំបួរ,ឃុំខ្ពប់តាងួន,ឃុំព្រះអណ្តូង និងឃុំពាមកោះស្នា ស្រុកស្ទឹងត្រង់នៅថ្ងៃនេះ។ លោកបានបន្តថាៈ បច្ចុប្បន្ន ផ្លូវគ្រោងស្ថាបនា នាពេលឆាប់ៗខាងមុខ ជាផ្លូវក្រួសក្រហម មានលក្ខណៈទ្រុឌទ្រោមខ្លាំង បង្កឱ្យប្រជាពលរដ្ឋ ធ្វើដំណើរឆ្លងកាត់ជួបបញ្ហាលំបាក។ ដោយពិនិត្យឃើញជាក់ស្តែង ពីលទ្ធផលចុះពិនិត្យស្ថានភាព នៅព្រឹកថ្ងៃទី១៩ កក្កដានេះ លោក អ៊ុន ចាន់ដា ជាអភិបាលខេត្ត ក៏ប្រកាសនៅចំពោះមុខមន្រ្តីក្រុមប្រឹក្សាឃុំ ឱ្យខាងលោក (ប្រាក់ ទិត្យ) ចុះសិក្សានៅថ្ងៃនេះតែម្តង ដើម្បីលើកគម្រោងសុំការស្ថាបនា ផ្លូវ មួយខ្សែនេះ ទៅកាន់ក្រសួងសាធារណការ និងដឹកជញ្ជួន ឱ្យបានមុនការបោះឆ្នោត នៅសល់តែបី ថ្ងៃទៀតនេះ៕