“ សុខមាលភាពរបស់ប្រជាពលរដ្ឋនឹងកាន់តែមានភាពល្អប្រសើរឡើង តាមរយៈការគ្រប់គ្រងទឹកកខ្វក់ និងអនាម័យ ” នេះជាការលើកឡើងរបស់ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន នៅក្នុងពិធីបើកសិក្ខាសាលាស្តីពីអច្ឆរិយភាពនៃបច្ចេកវិទ្យាទឹកកខ្វក់របស់ប្រទេសជប៉ុន ភ្នំពេញ៖ នៅថ្ងៃសុក្រ ៥កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែកុម្ភៈ ឆ្នាំ២០២៣ ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន លោក ម៉ម កាយ អភិបាលរងខេត្តតាកែវ លោក អាសុស៊ី តាជីម៉ា Atsushi TAJIMA ប្រធានការិយាល័យកិច្ចការអន្តរជាតិ និងវិស្វកម្មប្រព័ន្ធលូ នាយកដ្ឋានគ្រប់គ្រងប្រព័ន្ធលូ និងទឹកកខ្វក់ នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ ប្រទេសជប៉ុន បានអញ្ជើញជាសហអធិបតី ក្នុងពិធីបើកសិក្ខាសាលាស្តីពី អច្ឆរិយភាពនៃបច្ចេកវិទ្យាទឹកកខ្វក់របស់ប្រទេសជប៉ុន។ សិក្ខាសាលាខាងលើ ត្រូវបានរៀបចំធ្វើឡើងក្រោមកិច្ចសហប្រតិបត្តិការរវាងក្រសួងសាធារណការ និងដឹកជញ្ជូន ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ប្រទេសជប៉ុន រដ្ឋបាលខេត្តតាកែវ ទីភ្នាក់ងារសហប្រតិបត្តិការអន្តរជាតិជប៉ុន (JICA) និងក្រុមហ៊ុនកូប៊ែលខូ អ៊ីខូ-សីលូសិន ខូអិលធីឌី ។ គោលបំណងនៃសិក្ខាសាលានេះ ផ្តោតសំខាន់លើការចែករំលែកបច្ចេកវិទ្យាថ្មីៗរបស់ប្រទេសជប៉ុន ពាក់ព័ន្ធប្រព័ន្ធចម្រោះទឹកកខ្វក់ និងការគ្រប់គ្រងប្រព័ន្ធលូ។ ថ្លែងក្នុងពិធីបើកសិក្ខាសាលា ឯកឧត្តមអគ្គនាយក បានលើកឡើងអំពីការអភិវឌ្ឍប្រព័ន្ធចម្រោះទឹកកខ្វក់ ប្រព័ន្ធលូ ទីលានចាក់សំរាម និងការងារពាក់ព័ន្ធការរៀបចំផែនការមេ លិខិតបទដ្ឋានច្បាប់ និងបច្ចេកទេសនានា ដែលក្រសួងបាន និងកំពុងអនុវត្ត។ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលជប៉ុន ប្រជាជនជប៉ុន ក្រុមការងារ JICA ដែលបានជួយប្រទេសកម្ពុជាលើគ្រប់វិស័យ ពិសេសវិស័យប្រព័ន្ធទឹកកខ្វក់នេះ។ ឯកឧត្តម ក៏បានសំណូមពរ ដល់សិក្ខាកាមគ្រប់រូបត្រូវយកចំណេះដឹងដែលទទួលបានពីសិក្ខាសាលានេះ ទៅចែករំលែកបន្តដល់ក្រុមការងារនៅតាមអង្គភាពរបស់ខ្លួន។ សូមជម្រាបផងដែរថា បន្ទាប់ពីបញ្ចប់សិក្ខាសាលា សិក្ខាកាមក៏ចុះធ្វើទស្សនកិច្ចផ្ទាល់ទីតាំងអាងប្រព័ន្ធចម្រោះទឹកកខ្វក់ ដែលជាគម្រោងសាកល្បងជួយដោយប្រទេសជប៉ុន មានទីតាំងស្ថិតនៅក្នុងស្រុកបាទី ខេត្តតាកែវ៕