ការប្រឡងបញ្ចប់ឆមាសទី២ ថ្នាក់ឆ្នាំសិក្សាមូលដ្ឋាន ជំនាន់ទី២ នៃនិស្សិតវិទ្យាស្ថានតេជោសែន សាធារណការ និងដឹកជញ្ជូន ទីស្ដីការក្រសួង៖ ថ្ងៃពុធ ៤កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែមករា ឆ្នាំ២០២៣ ឯកឧត្តម ហឿន សំនៀង បានអញ្ជើញជាអធិបតីក្នុងកម្មវិធីបើកវិញ្ញាសាប្រឡងបញ្ចប់ឆមាសទី២ ថ្នាក់ឆ្នាំសិក្សាមូលដ្ឋាន របស់និស្សិតជំនាន់ទី២ នៃវិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំនាយកដ្ឋាន និងក្រុមការងារវិទ្យាស្ថានផងដែរ។ ថ្លែងក្នុងមតិស្វាគមន៍នាឱកាសនោះ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានសម្តែងសេចក្តីសោមនស្សរីករាយ ដែលបានចូលរួមបើកវិញ្ញាសាប្រឡងបញ្ចប់ឆមាសទី២ ឆ្នាំសិក្សាមូលដ្ឋាន ជូននិស្សិតជំនាន់ទី២ របស់វិទ្យាស្ថានតេជោសែន សាធារណការ និងដឹកជញ្ជូន និងបានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់អនុរក្សដែលឈរពិនិត្យតាមដានការប្រឡងនៅក្នុងថ្នាក់ប្រឡងរយៈពេលបីថ្ងៃនេះ។ ឯកឧត្តមនាយក ក៏បានថ្លែងអំណរគុណផងដែរដល់ថ្នាក់ដឹកនាំ និងក្រុមការងារវិទ្យាស្ថានដែលបានខិតខំប្រឹងប្រែងរៀបចំការប្រឡងឆមាសទី២ ឆ្នាំទី២ របស់និស្សិតជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន។ សូមជម្រាបជូនថា៖ ការប្រឡងបញ្ចប់ឆមាសទី២ ថ្នាក់ឆ្នាំសិក្សាមូលដ្ឋាន ជំនាន់ទី២ របស់និស្សិតវិទ្យាស្ថានតេជោ សែន សាធារណការ និងដឹកជញ្ជូន នេះ នឹងប្រព្រឹត្តទៅរយៈពេលបីថ្ងៃពេញ ទាំងព្រឹក និងពេលរសៀល ចាប់ពីថ្ងៃទី២៥ ដល់ថ្ងៃទី២៧ ខែមករា ឆ្នាំ២០២៣ នៅសាលប្រជុំទីស្តីការក្រសួង ដែលមាននិស្សិតជំនាន់ទី២ ចូលរួមប្រឡងលើជំនាញដូចជា ១). ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ២). ជំនាញប្រព័ន្ធចម្រោះទឹកកខ្វក់ ៣). ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤). ជំនាញភស្តុរភារកម្ម និងគ្រប់គ្រងខ្សែច្រវាក់ផ្គត់ផ្គង់ ៥). ជំនាញបើកបរនាវា និង ៦). ជំនាញម៉ាស៊ីននានា៕