នៅប៉ុន្មានឆ្នាំចុងក្រោយនេះ កម្ពុជាបានក្លាយជាគោលដៅសម្រាប់ការវិនិយោគដ៏សំខាន់ នៃក្រុមហ៊ុនធំៗទាំងជាតិ និងអន្ដរជាតិ។ ជាក់ស្ដែងថ្មីៗនេះ មានក្រុមហ៊ុនជួរមុខចំនួន ២ របស់ប្រទេសចិន និងជប៉ុន បានបង្ហាញពីការវិនិយោគរបស់ខ្លួនមកកាន់ប្រទេសកម្ពុជាផងដែរ។ ដោយក្រុមហ៊ុនយក្សទាំង ២ នោះរួមមាន៖១. ក្រុមហ៊ុន BYD Auto Industry BYD Auto Industry គឺជាក្រុមហ៊ុនផលិតរថយន្ដអគ្គិសនីដ៏ធំរបស់ប្រទេសចិន។ ហើយថ្មីៗនេះ BYD បានប្រកាសពីការបណ្ដាក់ទុនវិនិយោគដ៏សន្ធឹកសន្ធាប់លើការដំឡើងស្ថានីយបញ្ចូលថាមពលយានយន្តអគ្គិសនី (EV Charging Station) ប្រមាណ ២០០ ទីតាំងនៅក្នុងប្រទេសកម្ពុជា។ ការបណ្ដាក់ទុកដំឡើងស្ថានីយបញ្ចូលថាមពលដ៏ច្រើននេះត្រូវបានប្រកាសឡើងនៅក្នុងជំនួបរវាងឯកឧត្ដមទេសរដ្ឋមន្រ្ដី ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន ជាមួយលោក Marco Mok នាយកប្រតិបត្តិ BYD Cambodia កាលពីថ្ងៃទី២៤ ខែវិច្ឆិកា ឆ្នាំ២០២២។ តាមការបញ្ជាក់ ក្រុមហ៊ុន BYD មានផែនការក្នុងការដំឡើងស្ថានីយបញ្ចូលថាមពលយានយន្តអគ្គិសនីចំនួន ២០០ទីតាំងផ្សេងៗគ្នានៅទូទាំងប្រទេសកម្ពុជា ត្រឹមឆ្នាំ២០២៣ ខាងមុខ។២. ក្រុមហ៊ុន Toyota Toyota ដែលជាក្រុមហ៊ុនផលិតរថយន្ដលំដាប់ពិភពលោក និងជាក្រុមហ៊ុនជួរមុខរបស់ប្រទេសជប៉ុន ថ្មីៗនេះក៏បានបោះទុនវិនិយោគចំនួន ៣៦,៨ លាន​ដុល្លារ​សហរដ្ឋអាមេរិកបង្កើតក្រុមហ៊ុនដំឡើងរថយន្ដថ្មីមួយឈ្មោះថា Toyota Tsusho Manufacturing (Cambodia) Co., Ltd. (“TTMC”) ដើម្បីដំឡើងរថយន្ដនៅកម្ពុជា។ នៅក្នុងនោះក្រុមហ៊ុនបានសាងសង់រោងចក្រដំឡើងរថយន្ដនៅក្នុង​តំបន់​សេដ្ឋកិច្ចពិសេស រ៉ូយ៉ាល់ ​ភ្នំពេញផងដែរ។ តាមការបញ្ជាក់ក្រុមហ៊ុន​ Toyota រោងកច្រដំឡើងរថយន្ដថ្មីនៅទឹកដីកម្ពុជាដំបូងរបស់ខ្លួននេះ គឺនឹងដំឡើង​រថយន្ត​ប្រភេទ Pick-up​ និង SUV ដូចជា TOYOTA HILUX និង TOYOTA FORTUNER៕