កិច្ចប្រជុំថ្នាក់ដឹកនាំក្រសួងប្រចាំសប្តាហ៍ និងការប្រគល់-ទទួលសម្ភារឧបករណ៍ត្រួតពិនិត្យគុណភាពផ្លូវថ្នល់ជូនអង្គភាពជំនាញក្រោមឱវាទក្រសួង និងមន្ទីរសាធារណការ និងដឹកជញ្ជូនរាជធានី-ខេត្ត និងការប្រគល់-ទទួលអគារមន្ទីរពិសោធន៍ទាំងបួនទីតាំងស្ថិតនៅខេត្តសៀមរាប ខេត្តពោធិ៍សាត់ ខេត្តក្រចេះ និងខេត្តព្រះសីហនុ ទីស្តីការក្រសួង៖ ថ្ងៃពុធ ៩កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០២ ខែវិច្ឆិកា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូនបាន អញ្ជើញដឹកនាំកិច្ចប្រជុំថ្នាក់ដឹកនាំក្រសួងប្រចាំសប្តាហ៍ ដោយមានការចូលរួមពីមន្ត្រីជាន់ខ្ពស់ មន្ទីរសាធារណការ និង ដឹកជញ្ជូនរាជធានី-ខេត្ត និងមន្ត្រីជំនាញបច្ចេកទេសពាក់ព័ន្ធក្រោមឱវាទក្រសួង។ កិច្ចប្រជុំនេះផ្តោតលើការប្រកាសសុពលភាពមន្ត្រីរាជការទើបតែងតាំងថ្មីនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ការប្រគល់-ទទួលសម្ភារឧបករណ៍ត្រួតពិនិត្យគុណភាពផ្លូវថ្នល់ជូនអង្គភាពជំនាញក្រោមឱវាទក្រសួង និងមន្ទីរសាធារណៈការ និងដឹកជញ្ជូនរាជធានី-ខេត្ត និងការប្រគល់-ទទួល អគារមន្ទីរពិសោធន៍ទាំងបួនទីតាំងស្ថិតនៅខេត្តសៀមរាប ខេត្តពោធិ៍សាត់ ខេត្តក្រចេះ និងខេត្ត ព្រះសីហនុ។ ថ្លែងក្នុងឱកាសនោះ ឯកឧត្តមទេសរដ្ឋមន្ត្រី បានថ្លែងការកោតសរសើរយ៉ាងជ្រាលជ្រៅដល់ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដែលបានខិតខំប្រឹងប្រែងធ្វើកិច្ចការរបស់ខ្លួនបានជោគជ័យជាច្រើន ជាពិសេសការអភិវឌ្ឍកម្មវិធីបច្ចេកវិទ្យា​នានាក្នុងការសម្រួលដល់ការផ្តល់សេវាសាធារណៈសំដៅបង្កើនចំណូលជាតិយ៉ាងមានប្រសិទ្ធភាព និងដែលបានបំពេញការងារអស់ពីកម្លាំងកាយចិត្ត និងពេលវេលាក្នុងការបំពេញភារកិច្ចប្រកបដោយការទទួលខុសត្រូវខ្ពស់ ដើម្បីរួមចំណែកបម្រើប្រជាពលរដ្ឋ និងអភិវឌ្ឍប្រទេសតាមរយៈវិស័យសាធារណការ និងដឹកជញ្ជូន ឱ្យកាន់តែរីកចម្រើនជាលំដាប់។ ជាពិសេសអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នេះបាន​ និងកំពុងជំរុញការសហការជាមួយក្រុមហ៊ុនផ្លូវល្បឿនលឿន​ និងគ្រឹះស្ថានធនាគារ-ហិរញ្ញវត្ថុជាដៃគូ ក្នុងបំពាក់បច្ចេកវិទ្យា DIP សម្រាប់ការគ្រប់គ្រង និងប្រមូលចំណូលចេញចូលប្រេីប្រាស់ផ្លូវល្បឿនលឿន ដែលធានាភាពលឿនរហ័ស​ ងាយស្រួល​ សុវត្ថិភាព​ សម្រាប់អ្នកប្រេីប្រាស់ផ្លូវ​ និងធានាការធ្វេីអាជីវកម្មក្រុមហ៊ុនកាន់តែមានប្រសិទ្ធភាព​ និងតម្លាភាព​សម្រាប់សង្គមជាតិ​ ជាពិសេសធានាការប្រមូលចំណូលថវិកាជាតិ​ កាន់តែមាភាពប្រសេីរឡេីង ។ ប្រព័ន្ធបច្ចេកវិទ្យា​ DIP នេះ​ នឹងផ្តល់ភាពងាយស្រួលដល់ប្រជាពលរដ្ឋ​អាច​ បញ្ចូលសមតុល្យទឹកប្រាក់ជាមុន​ តាមរយៈផ្លាកលេខ និងជួយសម្រួលឱ្យការចេញចូលផ្លូវល្បឿនលឿន បានលឿនរហ័ស កាត់បន្ថយការកកស្ទះ បង្ការពីជំងឺកូវីដ១៩ ព្រមទាំងបញ្ជៀសការប្រើកាតចេញចូលដែលប្រឈមការបាត់បង់ផងដែរ​ ឬផាកពិន័យផ្សេងៗផងដែរ។​ ប្រព័ន្ធនេះ​ គ្រោងនឹងបញ្ចប់​ការរៀបចំ ដេីម្បីដាក់ឱ្យប្រេីប្រាស់​ ជាផ្លូវការ​ នាថ្ងៃ០៩​ វិច្ឆិកា​ ២០២២​ ខាងមុខនេះ។ ឯកឧត្តមទេសរដ្ឋមន្ត្រី បានសំណូមពរផងដែរឱ្យមន្ត្រីជំនាញពាក់ព័ន្ធក្រោមឱវាទប្រើប្រាស់សម្ភារឧបករណ៍ត្រួតពិនិត្យគុណភាពផ្លូវឱ្យមានប្រសិទ្ធភាព និងថែទាំឱ្យបានល្អ អាចប្រើប្រាស់បានយូរអង្វែង ដោយហេតុថាការចំណាយលើការទិញឧបករណ៍ទាំងនោះជាចំណាយថវិកាជាតិយើង និងបានណែនាំ ឱ្យមន្ត្រីពាក់ព័ន្ធសហការជាមួយធនាគារអភិវឌ្ឍន៍អាស៊ី ធនាគារពិភពលោក ក៏ដូចជាដៃគូអភិវឌ្ឍន៍នានា ស្វែងរកប្រភពថវិកាដើម្បីគូសគំនូសចរាចរណ៍ និងការបំពាក់ផ្លាកសញ្ញាចរាចរណ៍ឱ្យបានត្រឹមត្រូវ ដើម្បីចូលរួមកាត់បន្ថយគ្រោះថ្នាក់ចរាចរណ៍ឱ្យនៅកម្រិតទាប។ បន្ទាប់ពីកិច្ចប្រជុំត្រូវបានបិទបញ្ចប់ ឯកឧត្តមទេសរដ្ឋមន្ត្រី បានអញ្ជើញជាអធិបតីក្នុងពិធីប្រគល់-ទទួលសម្ភារឧបករណ៍ត្រួតពិនិត្យគុណភាពផ្លូវ ដែលជាឥណទានកម្ចីរបស់ធនាគារអភិវឌ្ឍន៍អាស៊ី សម្រាប់ទិញសម្ភារត្រួតពិនិត្យគុណភាពផ្លូវ ដើម្បីគាំទ្រដល់គំនិតផ្តួចផ្តើមរបស់ឯកឧត្តមទេសរដ្ឋមន្ត្រីក្នុងទិសដៅធ្វើឱ្យយ៉ាងណាឱ្យគុណភាពនៃការស្ថាបនាផ្លូវថ្នល់មានភាពរឹងមាំ និងអនុលោមតាមទស្សន វិស័យច្បាស់លាស់៕