ស្វាយរៀង៖ នៅថ្ងៃទី២៣ ខែមេសា ឆ្នាំ២០១៨នេះ នាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ នៃក្រសួងសាធារណការ និងដឹកជញ្ជូន សហការជាមួយរដ្ឋបាលខេត្តស្វាយរៀង បានរៀបចំពិធីក្រុងពាលី បញ្ចុះបឋមសិលា បើកការដ្ឋានសាងសង់កំពង់ផែអូរស្មាច់ ក្រោមអធិបតីភាពលោកស្រី ឯក សុវណ្ណភារៈ អភិបាលរងខេត្តស្វាយរៀង តំណាងលោក ម៉ែន វិបុល អភិបាលនៃគណៈអភិបាលខេត្តស្វាយរៀង និងលោក តាក់ ស៊ុនហួត អនុប្រធាននាយកដ្ឋានហេដ្ឋារចនាសម្ព័ន្ធផ្លូវទឹក និងសំណង់កំពង់ផែ។ ពិធីនោះដែរ ក៏មានការចូលរួមពី លោក នួន លីហួន ប្រធានមន្ទីរសាធារណការ និងដឹកជញ្ជូនខេត្តស្វាយរៀង លោកស្នងការរង នៃស្នងការដ្ឋាននគរបាលខេត្ត លោកមេបញ្ជាការរង នៃតំបន់ប្រតិបត្តិការសឹករងខេត្ត តំណាងបញ្ជាការដ្ឋានកងរាជអាវុធហត្ថខេត្តស្វាយរៀង លោកប្រធានមន្ទីរនានាជុំវិញខេត្ត អាជ្ញាធរក្រុងស្វាយរៀងគ្រប់លំដាប់ថ្នាក់ និងមន្រ្តីរាជការមន្ទីរសាធារណការ និងដឹកជញ្ជូនខេត្តស្វាយរៀង សរុបប្រមាណ ៦០នាក់។ លោកស្រីអភិបាលរងខេត្ត បានបញ្ជាក់ថា ដំណើរការបើកការដ្ឋានសាងសង់ គឺអនុវត្តតាមគម្រោងសាងសង់កំពង់ផែអូរស្មាច់ ស្ថិតក្នុងក្រុងស្វាយរៀង របស់ក្រសួងសាធារណការ និងដឹកជញ្ជូន ទៅលើការងារដូចខាងក្រោម៖ ១/ ការងារស្ថាបនាផ្លូវដីថ្មី ទំហំ ៨៦២ម x ៧ម និងចាក់ដីសម្រាប់សាងសង់កំពង់ផែអូរស្មាច់ (ទន្លេវ៉ៃគោ) ផ្ទៃដី ១៣.២៤៣ម៉ែត្រការ៉េ។ ២/ ការងារស្ថាបនាលើកដីធ្វើកំពង់ផែអូរស្មាច់ (ទន្លេវ៉ៃគោ) ទំហំ ៥០ម x ១០០ម កម្ពស់ ២.៦០ម ។ ៣/ ការងារស្ថាបនាផែដែកបណ្តែតទឹកទំហំ ៦០ម x ១២ម និងផ្លូវបេតុង ប្រវែង ៣៦ម ទទឹង ៦.៤០ម សម្រាប់ចុះផែ៕