គណៈប្រតិភូក្រសួង ធ្វើទស្សនកិច្ចសិក្សា និងជួបពិភាក្សាការងារជាមួយស្ថាប័នរដ្ឋ និងឯកជនប្រទេសវៀតណាម ដើម្បីស្វែងយល់អំពីដំណើរការនៃប្រតិបត្តិការការងារក្នុងវិស័យភស្តុភារកម្ម ក៏ដូចជាដើម្បីបង្កើន ចំណងមិត្តភាពក្នុងវិស័យភស្តុភារកម្មរវាងរដ្ឋ-ឯកជន និងឯកជន-ឯកជនរបស់ប្រទេសទាំងពីរ ទីក្រុងហូជីមិញ៖ ថ្ងៃអង្គារ-ព្រហស្បតិ៍ ៥-៧រោច ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹង ថ្ងៃទី១៧-១៩ ខែសីហា ឆ្នាំ២០២២ ឯកឧត្តម ប៉ែន បូរាណ អនុរដ្ឋលេខាធិការក្រសួងសាធារណការ និង ដឹកជញ្ជូន បានអញ្ជើញដឹកនាំគណៈប្រតិភូក្រសួង រួមមាន៖ សមាសភាពជាអគ្គនាយកនៃអគ្គនាយកដ្ឋានភស្តុភារកម្ម អភិបាលរងនៃគណៈអភិបាលខេត្តស្វាយរៀង និងមន្រ្តីជាន់ខ្ពស់មកពីកំពង់ផែស្វយ័តភ្នំពេញ អគ្គនាយកដ្ឋានដឹក ជញ្ជូនផ្លូវគោក អគ្គនាយកដ្ឋានដឹកជញ្ជូនផ្លូវទឹក សមុទ្រនិងកំពង់ផែ អគ្គនាយកដ្ឋានភស្តុភារកម្ម និងនាយកដ្ឋានផ្លូវដែក រួមជាមួយជំនាញការជប៉ុន ដើម្បីធ្វើទស្សនកិច្ចសិក្សា និងជួបពិភាក្សាការងារជាមួយស្ថាប័នរដ្ឋ និងឯកជននៅប្រទេសវៀតណាម។ ដំណើរទស្សនកិច្ចនេះមានគោលបំណងស្វែងយល់អំពីដំណើរការនៃប្រតិបត្តិការការងារក្នុងវិស័យភស្តុភារ កម្មពីវិស័យឯកជន ពិភាក្សាលើបញ្ហាប្រឈមនានាក្នុងការដឹកជញ្ជូនឆ្លងកាត់ព្រំដែនទាំងតាមច្រកផ្លូវទឹក និងផ្លូវគោក និង ពង្រឹងកិច្ចសហប្រតិបត្តិការ និងបង្កើនចំណងមិត្តភាពក្នុងវិស័យភស្តុភារកម្មរវាងរដ្ឋ-ឯកជន និងឯកជន-ឯកជនរបស់ប្រទេសទាំងពីរ។ គណៈប្រតិភូបានជួបពិភាក្សាជាមួយសមាគមភស្តុភារកម្មវៀតណាម ក្រុមហ៊ុន Global Logistics Service Co., Ltd. សមាគមVISABA កំពង់ផែ Cat Lai របស់ក្រុមហ៊ុនSNG (Saigon Newport Corporation) និងកំពង់ផែអន្តរជាតិGemalink។ ឆ្លៀតក្នុងឱកាសនោះ គណៈប្រតិភូក៏បានជួបពិភាក្សាការងារជាមួយអាជ្ញាធរនៅច្រកទ្វារព្រំដែនអន្តជាតិបាវិត-ម៉ុកបៃ ដើម្បីស្វែងយល់អំពីបញ្ហាប្រឈមនៃការដឹកជញ្ជូនឆ្លងកាត់ព្រំដែនអន្តរជាតិ បាវិត-ម៉ុកបៃផងដែរ។ ជាចុងក្រោយ ឯកឧត្តមអនុរដ្ឋលេខាធិការប្រធានគណៈប្រតិភូ បានថ្លែងអំណរគុណយ៉ាងជ្រាលជ្រៅដល់ភាគីពាក់ព័ន្ធនៅទីក្រុងហូជីមិញប្រទេសវៀតណាម ដែលបានឆ្លៀតពេលវេលាដ៏មានតម្លៃ និងមមាញឹក ដើម្បីទទួលជួបពិភាក្សា ចែករំលែកចំណេះដឹង បញ្ហាប្រឈម និងបទពិសោធន៍ល្អៗទៅវិញទៅមកក្នុងវិស័យដឹកជញ្ជូន និងភស្តុភារកម្ម៕