ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញចូលរួមព្រឹត្តិការណ៍សង្ក្រាន្តដែលរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន(TSI) និងទស្សនាការសម្តែងរបាំត្រុដិ ដែលដឹកនាំសម្តែងដោយនិស្សិតវិទ្យាស្ថានក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ថ្ងៃពុធ ៥កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៦ ខែមេសា ឆ្នាំ២០២២ នៅទីស្តីការ ក្រសួង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញ ចូលរួមព្រឹត្តិការណ៍សង្ក្រាន្តដែលរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន និងទស្សនាការសម្តែងរបាំត្រុដិ ដែលដឹកនាំសម្តែងដោយនិស្សិតវិទ្យាស្ថាន ដោយមានការអញ្ជើញចូលរួមពីឯកឧត្តម លោកជំទាវជាថ្នាក់ដឹកនាំក្រសួង ថ្នាក់ដឹកនាំវិទ្យាស្ថាន មន្ត្រីរាជការក្រោមឱវាទក្រសួង និងសិស្ស និស្សិតផងដែរ។ កម្មវិធីនេះមានការរៀបចំជាស្តង់ពិព័រណ៍ផ្សេងៗ ការលេងល្បែងប្រជាប្រិយ និងការប្រគុំតន្ត្រីផងដែរ ក្នុងគោលបំណងដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ និងបង្កើនភាពស្និទ្ធស្នាលរវាងថ្នាក់ ដឹកនាំមន្ត្រីរាជការនៃក្រសួងសាធារណការ និងដឹកជញ្ជូន លោកគ្រូ-អ្នកគ្រូ សាស្ត្រាចារ្យ សិស្សនិស្សិត ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ពុទ្ធសករាជ ២៥៦៦ គ្រិស្តសករាជ ២០២២ ទេវតាឆ្នាំថ្មី ព្រះនាម កិរិណីទេវី។ ថ្លែងក្នុងប្រសាសន៍សំណេះសំណាលនាឱកាសនោះ ឯកឧត្តមទេសរដ្ឋមន្ត្រី បានថ្លែងអំណរគុណដល់ វិទ្យាស្ថានតេជោសែន សាធារណការ និងដឹកជញ្ជូន និងសប្បុរសជនដែលបានចូលរួមបង្កើតកម្មវិធីនេះឡើងដើម្បីអបអរសាទរ ក្នុងឱកាសបុណ្យចូលឆ្នាំប្រពៃណីខ្មែរយើង និងបានមានប្រសាសន៍ផ្ដាំផ្ញើដល់ សិស្សនិស្សិតឱ្យខិតខំប្រឹងប្រែងរៀនសូត្រដើម្បីចូលរួមកសាងប្រព័ន្ធហេដ្ឋារចនាសម្ព័ន្ធរបស់យើងឱ្យកាន់ តែមានការរីកចម្រើនឡើងថែមទៀត ក្នុងនាមយុវជនជាទំពាំងស្នងឫស្សី។ សូមជម្រាបជូនថា៖ ថវិកាដែលបានមកពីព្រឹត្តិការណ៍សង្ក្រាន្តដែលរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូន(TSI) នាពេលនេះ នឹងត្រូវយកទៅចូលរួមចំណែកបរិចា្ចគទៅមន្ទីរពេទ្យគន្ធបុប្ផា៕