កណ្តាល៖ ឯកឧត្តម ទេសរដ្ឋមន្ត្រី ស៊ុន ចាន់ថុល បានមានប្រសាសន៍ថា ផែនការមេភស្តុភាកម្មនេះ ត្រូវការទឹកប្រាក់វិនិយោគប្រមាណ ៥០ ពាន់លានដុល្លារអាមេរិក សម្រាប់រយៈពេល១០ឆ្នាំ លើគម្រោងវិនិយោគប្រមាណ៣០០គម្រោង នៅក្នុងប្រទេសកម្ពុជា ដើម្បីធ្វើឱ្យប្រសើរឡើង ដល់ហេដ្ឋារចនាសម្ព័ន្ធកម្ពុជា កាន់តែមានប្រសិទ្ធភាព និងផលិត ភាពនៅកម្ពុជា។ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងបែបនេះនៅថ្ងៃអង្គារ ទី២២ ខែមីនា ឆ្នាំ ២០២២ ក្នុងពិធីបញ្ចុះបឋមសិលាសាងសង់ឃ្លាំងស្តុកទំនិញត្រជាក់នៅកំពង់ផែស្វយ័តភ្នំពេញ (ចំណតផែកុងតឺន័រLM១៧) ។ ឯកឧត្តមទេសរដ្ឋមន្ត្រី បានបន្ថែមថា៖ ផែនការមេភស្តុភាកម្មនេះត្រូវការទឹកប្រាក់វិនិយោគប្រមាណ ៥០ ពាន់លានដុល្លារអាមេរិកសម្រាប់រយៈពេល១០ឆ្នាំ លើគម្រោងវិនិយោគប្រមាណ៣០០គម្រោង នៅក្នុង ប្រទេសកម្ពុជា ដើម្បីធ្វើឱ្យប្រសើរឡើងដល់ហេដ្ឋារចនាសម្ព័ន្ធកម្ពុជាកាន់តែមានប្រសិទ្ធភាព និងផលិត ភាពនៅកម្ពុជា។ បន្ថែមទៅលើការងារភស្តុភារកម្ម ឯកឧត្តមទេសរដ្ឋមន្ត្រី បានកត់សម្គាល់ថា៖ រាជរដ្ឋាភិបាលបានវិនិយោគ យ៉ាងច្រើនលើការកសាងហេដ្ឋារចនាសម្ព័ន្ធផ្លូវថ្នល់ ស្ពាន កំពង់ផែ បណ្ដាញផ្លូវថ្នល់ ជាមួយនឹងការរីក ចម្រើនគួរឱ្យកត់សម្គាល់ ចាប់តាំងពីកម្ពុជាបានទទួលសុខសន្តិភាព និងស្ថិរភាពនយោបាយពេញលេញ នៅទូទាំងប្រទេសនៅឆ្នាំ១៩៩៨ ក្នុងនោះ៖ រាជរដ្ឋាភិបាលបានបញ្ចប់ការកសាងប្រព័ន្ធផ្លូវថ្នល់ប្រមាណ ១៨ ០០០ គីឡូម៉ែត្រ និងបានធ្វើឱ្យប្រសើរឡើងព្រលានយន្តហោះអន្តរជាតិភ្នំពេញ ព្រលានយន្តហោះ អន្តរជាតិខេត្តសៀមរាប ព្រលានយន្តហោះអន្តរជាតិក្រុងព្រះសីហនុ និងបានតភ្ជាប់ផ្លូវដែកឡើងវិញរវាងប្រទេសកម្ពុជា និងប្រទេសថៃ និងបានពង្រីកសមត្ថភាពកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុជាដើម។ គួរកត់សម្គាល់ផងដែរថា៖ ការសាងសង់ឃ្លាំងស្តុកទុក ទំនិញត្រជាក់នេះ នៅក្នុងបរិវេណចំណតផែកុងតឺន័រ LM១៧ របស់ ក.ស.ភ ដែលស្ថិតនៅភូមិកណ្ដាលលើ ឃុំបន្ទាយដែក ស្រុកកៀនស្វាយ ខេត្តកណ្ដាល អាចជួយជំរុញកំណើនសេដ្ឋកិច្ចរបស់កម្ពុជាតាមរយៈការ ចូលរួមចំណែកលើកកម្ពស់ខ្សែសង្វាក់នៃវិស័យភស្តុភាកម្មក្នុងប្រទេសកម្ពុជា។ កំណើនចរាចរណ៍ទំនិញ ឆ្លងកាត់នឹងមានសន្ទុះតាមរយៈការផ្ដល់សេវាកម្មស្តុករក្សាទុកនូវទំនិញត្រជាក់ ទាំងសម្រាប់នាំចេញ និង នាំចូលដែលមានដូចជា៖ ត្រី សាច់ កសិផល ឱសថ គ្រឿងសំអាង និងទំនិញច្រើនប្រភេទទៀត។ គម្រោងខាងលើនេះនឹងជួយបង្កើតការងារធ្វើបន្ថែម និងលើកស្ទួយកម្រិតជីវភាពរស់នៅរបស់ប្រជាពលរដ្ឋ នៅក្នុងតំបន់នេះ និងផ្ដល់អត្ថប្រយោជន៍ជាច្រើនទៀត ដល់វិនិយោគិន ពាណិជ្ជករ អាជីវករ ធុរជន និង សាធារណជនទូទៅដែលមានបំណង មកប្រើប្រាស់សេវាកម្មរបស់ក្រុមហ៊ុន ដើម្បីសម្រួលដល់ដំណើរការនាំចេញ នាំចូលទំនិញ រវាងកម្ពុជា និងសកលលោក៕ រក្សាសិទ្ធិដោយ ៖ សុទ្ធ​ លី