កំពង់ធំ៖ ឯកឧត្ដម ហ៊ាង ស៊ីណេ អនុរដ្ឋលេខាធិការ ក្រសួងអប់រំយុវជន និងកីឡាព្រឹកថ្ងៃទី ៥ ខែ វិច្ឆិកា ឆ្នាំ ២០២១បានអញ្ជើញជាអធិបតីភាព ពិធីប្រគល់ រនាំងសុវត្ថិភាពចរាចរណ៍ចំនួន៤០០រនាំង ឧបត្ថម្ភពីក្រុមហ៊ុនព្រូដិនសល កម្ពុជាជូនដល់មន្ទីរអប់រំយុវជននិងកីឡាចំនួន១៧ខេត្ត។ ពិធីប្រគល់រនាំង សុវត្ថិភាពនេះបានប្រារព្វនៅអគារគរុកោសល្យ ខេត្ត កំពង់ធំ ដោយមានការអញ្ជើញ ចូលរួមដោយ ឯកឧត្ដម ចាន់ តារា អភិបាលរងខេត្ត កំពង់ធំ លោក លោកស្រី តំណាងក្រុមហ៊ុន ព្រូដិនសលកម្ពុជា តំណាងអង្គការសម្ព័ន្ធ ដើម្បីសុវត្ថិភាពចរាចរណ៍ផ្លូវគោក និងប្រធាន អនុប្រធានមន្ទីរអប់រំយុវជននិងកីឡា មកខេត្តចំនួន១៧។ បន្ទាប់ពីលោក តាន់ ប៊ុនហុង ប្រធានមន្ទីរអប់រំយុវជននិងកីឡា ខេត្ត កំពង់ធំ ថ្លែងរបាយការណ៍ស្វាគមន៍ គណអធិបតីរួចមក លោកស្រី ហួតសាន់នី តំណាង ក្រុមហ៊ុនព្រូដិនសលកម្ពុជា បានលើកឡើង បញ្ជាក់ក្រៅពីសកម្មភាពរបស់ក្រុមហ៊ុន ធានារាប់រងអាយុជីវិត ឈានមុខគេនៅកម្ពុជា ក្រុមហ៊ុនព្រូដិនសលបានរួមចំណែក ជាមួយរាជរដ្ឋាភិបាល លើកិច្ចការសង្គមដូចជា វិស័យសុខាភិបាលផ្តល់ម៉ាស់អាល់កុល និងវិស័យអប់រំបបានផ្តល់ រនាំងសុវត្ថិភាពជាបន្តបន្ទាប់ ជាក់ស្តែងថ្ងៃនេះចំនួន៤០០រនាំងថែមទៀត។ ជាមួយគ្នានេះដែរ លោកស្រី តំណាងអង្គការសម្ព័ន្ធ ដើម្បីសុវត្ថិភាពចរាចរណ៍ផ្លូវគោកបានមាន មតិសំដែងការអបអរសារទរចំពោះ ការគាំទ្រផ្តល់រនាំងសុវត្ថិភាពពីក្រុមហ៊ុន ព្រូដិនសលកម្ពុជា និងបានចាត់ទុកកិច្ចការនេះជាផ្នែកមួយបានរួមចំណែកទប់ស្កាត់បង្កាគ្រោះថ្នាក់ចរាចរណ៍នៅកម្ពុជា។ ឯកឧត្តម ចាន់ តារា និងឯកឧត្តម ហ៊ាង ស៊ីណេជាគណអធិបតី បានមានប្រសាសន៍ជំរុញ ដល់ស្ថាប័នជំនាញនិងលោកគ្រូអ្នកគ្រូរួមគ្នា បន្តផ្សព្វផ្សាយតាមសាលារៀន ដើម្បីសុវត្ថិភាពចរាចរណ៍។ ឯកឧត្តម គណៈអធិបតីបានរំលឹកពី ឧបស័គ្គការងារនិងបទពិសោធន៍ឆ្លងកាត់ការលំបាក់នៅក្នុងសម័យកូវីដ១៩ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែនជាប្រមុខ ដឹកនាំរហូតដល់ពេលនេះ វិស័យអប់រំបានអោយសិស្សានុសិស្ស ចូលរៀនសូត្រឡើងវិញ ខណៈយើងនៅតែបន្តអនុវត្តវិធានការ ៣កុំ៣ការពារ។ ចុងក្រោយគណៈអធិបតីបានផ្តាំផ្ញើអោយមានការថែរក្សានូវរនាំងសុវត្ថិភាពនេះ អោយបានល្អយូរអង្វែងនិងដោយឡែកបានថ្លែងអំណរគុណ ដល់ក្រុមហ៊ុន ព្រូដិនសលកម្ពុជា សូមបន្តជួយផ្តល់រនាំងសុវត្ថិភាពបន្ថែមដល់ខេត្តចំនួន៨ទៀតផងដែរ។