[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល ដឹកនាំគណៈប្រតិភូ ចូលរួមវេទិកាសេដ្ឋកិច្ចពិភពលោក តាមប្រព័ន្ធវីដេអូ ពីចម្ងាយ
សៀមរាបៈ នៅថ្ងៃទី២៩ ខែមិថុនា ឆ្នាំ២០២១ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង អញ្ជើញចូលរួមវេទិកា សេដ្ឋកិច្ចពិភពលោក តាមប្រព័ន្ធវីដេអូពីចម្ងាយ ក្រោមប្រធានបទៈ “ការងើបឡើងវិញ នៃសកម្មភាពពាណិជ្ជកម្ម៖ ការលើកកម្ពស់សេដ្ឋកិច្ច តំបន់ឡើងវិញ ជាមួយនឹងខ្សែសង្វាក់ផ្គត់ផ្គង់ ប្រកបដោយភាពធន់” ។
ថ្លែងក្នុងសុន្ទរកថា ស្តីពីការត្រៀមខ្លួនរបស់កម្ពុជា ឆ្ពោះទៅរកសេដ្ឋកិច្ចឌីជីថលតំបន់ ទៅកាន់មេដឹកនាំ មកពីជុំវិញពិភពលោក អញ្ជើញចូលរួមក្នុងវេទិកានេះ លោកទេសរដ្ឋមន្ត្រី បានគូសបញ្ជាក់ ពីសារសំខាន់ នៃប្រព័ន្ធឌីជីថល ក្នុងការកាត់បន្ថយ ផលប៉ះពាល់ ពីជំងឺកូវីដ-១៩ និងជាដំណោះស្រាយ ប្រកបដោយប្រសិទ្ធភាព ដើម្បីទ្រទ្រង់សកម្មភាពសាធារណៈ និងពាណិជ្ជកម្ម។ វាអាចជួយឱ្យរដ្ឋ ជាសមាជិកអាស៊ាន ធ្វើការរួមគ្នា ដើម្បីលើកកម្ពស់អាស៊ាន ជាសហគមន៍ តភ្ជាប់ប្រព័ន្ធឌីជីថលតែមួយ និងជំរុញការតភ្ជាប់របស់ខ្លួន ដើម្បីពន្លឿនការងើប ឡើងវិញ នៃការអភិវឌ្ឍ សេដ្ឋកិច្ច និងសង្គម។
លោកទេសរដ្ឋមន្ត្រី បានគូសបញ្ជាក់បន្ថែមថាៈ កម្ពុជាបានកំណត់អាទិភាពរបស់ខ្លួន ក្នុងការជំរុញ ប្រព័ន្ធឌីជីថល នៅកម្ពុជា ដើម្បីធានាបាននូវលំហូរ ដោយរលូននៃទំនិញ សេវា ការងារជំនាញ មូលធន និងទិន្នន័យ។ ដូច្នេះកម្ពុជា ចាំបាច់ត្រូវផ្តោតជាសំខាន់ កិច្ចសហប្រតិបត្តិការច្បាប់ និងស្ថាប័ន ដើម្បីសម្របខ្លួន ទៅនឹងបដិវត្តឌីជីថល សម្រាប់ពាណិជ្ជកម្ម ការវិនិយោគ កិច្ចសម្រួលពាណិជ្ជកម្ម សហគ្រាសខ្នាតតូច និងមធ្យម និងការអភិវឌ្ឍជំនាញ កាន់តែមានប្រសិទ្ធភាព ជាងមុន។
ជាមួយគ្នានេះផងដែរ លោកទេសរដ្ឋមន្ត្រី បានសង្កាត់ធ្ងន់ធ្ងរថាៈ ដើម្បីសម្រេចចក្ខុវិស័យ ឆ្ពោះទៅរក សេដ្ឋកិច្ចឌីជីថលតំបន់ កម្ពុជាបានប្តេជ្ញា ចាប់ផ្តើមអនុវត្តប្រព័ន្ធគយ ASYCUDA គម្រោងតភ្ជាប់ប្រព័ន្ធស្វយ័តប្រវត្តិកម្ម Port EDIជាមួយប្រព័ន្ធ ASYCUDA ដើម្បីសម្រួលដល់ ការដឹកជញ្ជូន និងពាណិជ្ជកម្ម ប្រកបដោយប្រសិទ្ធភាព បានអនុម័តច្បាប់ ស្តីពីការធ្វើពាណិជ្ជកម្ម តាមប្រព័ន្ធអេឡិចត្រូនិក បានដាក់ឱ្យ ដំណើរការជាផ្លូវការប្រព័ន្ធចុះបញ្ជីពាណិជ្ជកម្មតាមអនឡាញ ច្រកចេញចូលតែមួយរបស់អាស៊ាន (Asean Single Window) ហើយជាពិសេស ក្នុងពេលថ្មីៗ កន្លងទៅនេះ កម្ពុជាបានប្រកាសជាផ្លូវការនូវ ការអនុវត្តក្របខណ្ឌ គោលនយោបាយសង្គម និងសេដ្ឋកិច្ចឌីជីថលកម្ពុជា ឆ្នាំ២០២១-២០៣៥ ផងដែរ៕
