(សៀមរាប)៖ យោងតាមលិខិតដែលចុះហត្ថលេខាដោយ អភិបាលខេត្តសៀមរាប ទៀ សីហា បានជូនដំណឹង ស្តីពីការហាមឃាត់ការតភ្ជាប់បណ្តាញលូទឹកភ្លៀង និងទឹកកខ្វក់ ចូលក្នុងលូទឹកភ្លៀង និងទឹកកខ្វក់ក្នុងដំណាក់កាលនៃការសាងសង់ គម្រោងស្ថាបនាហេដ្ឋារចនាសម្ព័ន្ធផ្លូវ៣៨ ខ្សែ ក្នុងក្រុងសៀមរាប ខេត្តសៀមរាប។ ការជូនដំណឹងនេះ​​ បន្ទាប់ពីអាជ្ញាធររកឃើញថា ពលរដ្ឋនិងអាជីវកម្មមួយចំនួន នៅតែលួចតភ្ជាប់បណ្តាញលូទឹកភ្លៀង និងទឹកកខ្វក់ ចូលក្នុងលូទឹកភ្លៀង និងទឹកកខ្វក់ក្នុងដំណាក់កាលនៃការសាងសង់ផ្លូវនេះ។ ការលួចតនេះ ធ្វើឲ្យប៉ះពាល់ដល់គុណភាពផ្លូវ និងសុខភាពពលរដ្ឋក្នុងសហគមន៍។ សូមជំរាបថា សម្ដេចតេជោ ហ៊ុន សែន កាលពីព្រឹកថ្ងៃទី ៤ កញ្ញា ឆ្នាំ២០២០ ​បានប្រកាសសម្រេចកញ្ចប់ថវិកាចំនួន ១៥០លានដុល្លារ សម្រាប់អភិវឌ្ឍន៍កសាងផ្លូវចំនួន ៣៨ ខ្សែ នៅក្នុងទីរួមខេត្តសៀមរាប។ គម្រោងផ្លូវ ៣៨ ខ្សែ នេះមានប្រវែងសរុបប្រមាណ ៩៨,៣៤គ.ម ដែលត្រូវបានសិក្សាដោយក្រសួងសាធារណការ និងដឹកជញ្ជូន។ ផ្លូវទាំង ៣៨ នេះនឹងក្លាយជាបណ្តុំបណ្ដាញផ្លូវមេយ៉ាងប្រទាក់ក្រឡាក្នុងក្រុងសៀមរាប ដែលក្រសួងកំពុងជួសជុលកែលម្អឡើងវិញ៕