ថ្ងៃព្រហស្បតិ៍ ៧កើត ខែផល្គុន ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៩ ខែកុម្ភៈ ឆ្នាំ២០២១ នៅទីស្ដីការក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន តំណាងឯកឧត្តម ប៉ាល់ ចន្ទតារា រដ្ឋលេខាធិការ និងជាអនុប្រធានក្រុមការងារ បានអញ្ជើញដឹកនាំកិច្ចប្រជុំក្រុមការងាររៀបចំសេចក្តីព្រាងច្បាប់ស្តីពីទឹកកខ្វក់និងប្រព័ន្ធលូ ដើម្បីពិនិត្យពិភាក្សានិងកែសម្រួលបន្តលើខ្លឹមសារនៃសេចក្តីព្រាងច្បាប់នេះ ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធផងដែរ។ ឯកឧត្តមអនុរដ្ឋលេខាធិការ បានជំរុញឱ្យក្រុមការងារបច្ចេកទេសពិភាក្សាផ្លាស់ប្តូរយោបល់ ក៏ដូចជាប្រមូលធាតុចូលសំខាន់ៗឱ្យបានច្រើនថែមទៀតពីគ្រប់ភាគីពាក់ព័ន្ធទាំងអស់សំដៅធ្វើយ៉ាងណាឱ្យសេចក្តីព្រាងច្បាប់នេះឆាប់ចេញជារូបរាងឡើង និងបញ្ជូនទៅស្ថាប័នពាក់ព័ន្ធដើម្បីពិនិត្យពិភាក្សាបន្ត។ គួរកត់សម្គាល់ថា៖ នៅពេលច្បាប់នេះលេចចេញជារូបរាងឡើង វានឹងជួយគ្រប់គ្រងបានយ៉ាងមានប្រសិទ្ធភាពនូវប្រព័ន្ធបណ្តាញលូ និងការតភ្ជាប់បណ្តាញលូពីផ្ទះប្រជាពលរដ្ឋមកកាន់ស្ថានីយប្រព្រឹត្តកម្ម ដែលមានសមត្ថភាពគ្រប់គ្រាន់អាចច្រោះទឹកកខ្វក់ពីតាមផ្ទះប្រជាពលរដ្ឋធ្វើឱ្យប្រសើរឡើងដល់ស្ថានភាពសុខុមាលភាព និងអនាម័យប្រជាពលរដ្ឋកាន់តែប្រសើរឡើង៕