កិច្ចប្រជុំស្តីពីការត្រៀមរៀបចំអនុវត្តប្រព័ន្ធគ្រប់គ្រងបន្ទប់ប្រជុំ និងកាលវិភាគប្រជុំ ប្រព័ន្ធគ្រប់គ្រងវត្តមានមន្ត្រីរាជការ និងប្រព័ន្ធគ្រប់គ្រងលំហូរឯកសាររដ្ឋបាល ថ្ងៃសុក្រ ០៨រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៥ ខែកុម្ភៈ ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូន ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន បានដឹកនាំកិច្ចប្រជុំដើម្បីពិភាក្សាត្រៀមលក្ខណៈក្នុងការអនុវត្ត កម្មវិធីគ្រប់គ្រងបន្ទប់ប្រជុំ និងកាលវិភាគប្រជុំ (MPWT Calendar) ប្រព័ន្ធគ្រប់គ្រងវត្តមានមន្ត្រីរាជការ(MPWT Attendant Management System) និងប្រព័ន្ធគ្រប់គ្រងលំហូរឯកសាររដ្ឋបាល ដោយមានការចូលរួមពីនាយកដ្ឋានព័ត៌មានវិទ្យា និងទំនាក់ទំនងសាធារណៈ នាយកដ្ឋានរដ្ឋបាល និងនាយកដ្ឋានបុគ្គលិក។ ដើម្បីឆ្លើយតបទៅនឹងបញ្ហាប្រឈមក្នុងការស្នើសុំបន្ទប់ប្រជុំ ការជូនដំណឹង ក៏ដូចជាបង្កភាពងាយស្រួលក្នុងការតាមដានកាលវិភាគប្រជុំរបស់ថ្នាក់ដឹកនាំ នាយកដ្ឋានព័ត៌មានវិទ្យា និងទំនាក់ទំនងសាធារណៈបានរៀបចំនូវកម្មវិធីទូរសព្ទដៃ ដែលអនុញ្ញាតឲ្យនាយកដ្ឋានរដ្ឋបាលដែលទទួលបន្ទុកក្នុងការគ្រប់គ្រងបន្ទប់ប្រជុំ អាចកំណត់និងគ្រប់គ្រងបានទៅលើការស្នើសុំបន្ទប់ប្រជុំ និងឆ្លើយតបទៅតាមការស្នើសុំដើម្បីជៀសវាងការជាន់បន្ទប់ប្រជុំ។ លើសពីនេះទៅទៀតកម្មវិធីនេះក៏នឹងអនុញ្ញាតឲ្យថ្នាក់ដឹកនាំតាមដាននូវកាលវិភាគប្រជុំផ្ទាល់ខ្លួន និងតាមដានកាលវិភាគប្រជុំជាទូទៅផងដែរ។ សម្រាប់ប្រព័ន្ធគ្រប់គ្រងវត្តមានមន្ត្រីរាជការ(MPWT Attendant Management System)វិញ នឹងអនុញ្ញាតឲ្យនាយកដ្ឋានបុគ្គលិកអាចធ្វើការគ្រប់គ្រងវត្តមានមន្ត្រីរាជការតាមរយៈឧបករណ៍ស្កេនមុខ កត់ត្រាវត្តមាន កំណត់ពេលវេលាចូល-ចេញ និងចំនួនម៉ោងបំពេញការងារដែលជាមូលដ្ឋានក្នុងការវាយតម្លៃការបំពេញការងាររបស់មន្ត្រី ការផ្តល់ប្រាក់ឧបត្ថម្ភប្រចាំខែជូនមន្ត្រី ក៏ដូចជាជ្រើសរើសមន្ត្រីឆ្នើមប្រចាំខែប្រកបដោយ សុក្រិតភាព និងតម្លាភាព។ ចំពោះប្រព័ន្ធគ្រប់គ្រងលំហូរឯកសាររដ្ឋបាល នឹងជួយសម្រួលដល់ការគ្រប់គ្រងលំហូរឯកសារពីដើមដល់ចប់ ការចុះហត្ថលេខាអេឡិចត្រូនិចលើឯកសារ និងការតម្កល់ទុកឯកសារផ្នែកទន់ ដែលបង្កភាពងាយស្រួលក្នុងការតាមដាន និងស្វែងរកឯកសារ។ ក្រោយកិច្ចប្រជុំពិភាក្សា អង្គប្រជុំសម្រេចនឹងដាក់អនុវត្តនូវ កម្មវិធីគ្រប់គ្រងបន្ទប់ប្រជុំ និងកាលវិភាគប្រជុំ (MPWT Calendar)។ ប្រព័ន្ធគ្រប់គ្រងវត្តមានមន្ត្រីរាជការ (MPWT Attendant Management System) នឹងត្រូវដាក់ឱ្យដំណេីរការក្នុង ពេលឆាប់ៗនេះ បន្ទាប់ពីរៀបចំនូវសេចក្តីណែនាំផ្លូវការ ដល់អង្គភាពក្រោមឱវាទក្រសួងរួចរាល់។ រីឯប្រព័ន្ធគ្រប់គ្រងលំហូរឯកសាររដ្ឋបាល នឹងត្រូវកែសម្រួលធ្វើឱ្យប្រសើរឡើងថែមទៀត មុននឹងពិនិត្យលទ្ធភាព ដាក់ឱ្យប្រើប្រាស់ជាផ្លូវការ។