ភ្នំពេញ៖ ចាប់ពីថ្ងៃនេះតទៅ ជនពិការជាប្រជាពលរដ្ឋខ្មែរ អាចប្រឡងយកបណ្ណបើកបរ ដែលមានសុពលភាពរយៈពេល ១០ឆ្នាំដូចប្រជាពលរដ្ឋទូទៅដែរ។ ដោយឡែក ជនពិការដែលជាជនបរទេស អាចប្ដូរបណ្ណបើកបរកម្ពុជា ដែលមានសុពលភាពរយៈពេល១ឆ្នាំ។ លោក ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និង យុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ បានឱ្យដឹងថា ប្រភេទយានយន្តសម្រាប់ជនមានពិការភាព រួមមាន ទោចក្រយានយន្ត ដែលមានទំហំស៊ីឡាំងលើសពី១២៥សង់ទីម៉ែត្រគូប ឬមានថាមពលអគ្គិសនីលើសពី ១១ គីឡូវ៉ាត់ ទោចក្រយានយន្តសណ្តោងរ៉ឺម៉ក ត្រីចក្រយានយន្ត និងម៉ូតូកង់បួន រថយន្តដឹកអ្នកដំណើរមិនលើស ពី៩នាក់ ដោយគិតទាំងអ្នកបើកបរ និងរថយន្តដឹកទំនិញ ដែលមានទម្ងន់សរុបអតិបរមាមិនលើសពី៣,៥តោន គឺជនមានពិការភាពអាចមានសិទ្ធិប្រើប្រាស់បាន។ លោករដ្ឋលេខាធិការ បន្ថែមថា ផ្នែកសំខាន់ៗនៃយានយន្តដែលត្រូវកែច្នៃ មានដូចជា ហ្នឹង ហ្គារ ចង្កឹះលេខ ដៃចង្កូត កៅអី សម្រាប់រថយន្ត និងកែច្នៃពីកង់ពីរ ទៅកង់បីសម្រាប់ទោចក្រយានយន្ត ត្រូវមានភាពសមស្របបង្កលក្ខណៈងាយស្រួល និងធានាសុវត្ថិភាព៕