ក្រសួងសាធារណការ និងដឹកជញ្ជូន បើកវគ្គបណ្ដុះបណ្ដាល ស្ដីពីបែបបទនៃការតាត់តែងលិខិតរដ្ឋបាល ជាភាសាអង់គ្លេសទៅបណ្តាស្ថាប័ន ស្ថានទូត និងដៃគូអភិវឌ្ឍន៍អន្តរជាតិ និងចែករំលែកចំណេះដឹង បទ ពិសោធន៍ក្នុងការងារដល់សិក្ខាកាមអំពីរបៀបនៃការតាក់តែងលិខិតរដ្ឋបាលជាភាសាអង់គ្លេស ដើម្បី សម្រេចទិសដៅការងារដែលបានដាក់ចេញ ភ្នំពេញ៖ ថ្ងៃអង្គារ ១១រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៣ ខែតុលា ឆ្នាំ២០២០ នៅទីស្ដីការក្រសួង ឯកឧត្ដម កែន រដ្ឋា អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញ ជាអធិបតីក្នុងពិធីបើកវគ្គបណ្ដុះបណ្ដាលស្ដីពីបែបបទនៃការតាក់តែងលិខិតរដ្ឋបាលជាភាសាអង់គ្លេសទៅបណ្តាស្ថាប័ន ស្ថានទូត និងដៃគូអភិវឌ្ឍន៍អន្តរជាតិ ដោយមានការចូលរួមពីមន្ត្រី ពាក់ព័ន្ធនៃបណ្តា អង្គភាពក្រោមឱវាទក្រសួងប្រមាណ ២៥រូប។ វគ្គបណ្ដុះបណ្ដាលនេះធ្វើឡើងដើម្បីផ្តល់ចំណេះដឹងនិងជំនាញបន្ថែមទៀតដល់មន្ត្រីរាជការក្រោមឱវាទក្រសួង តាមរយៈការចែករំលែកចំណេះដឹង និងបទពិសោធន៍ក្នុងការងារផ្ទាល់ខ្លួនដល់អង្គសិក្ខាកាមអំពីរបៀប នៃការតាក់តែងលិខិតរដ្ឋបាលជាភាសាអង់គ្លេសទៅបណ្តាស្ថាប័នពាក់ព័ន្ធ ស្ថានទូត និងដៃគូអភិវឌ្ឍន៍អន្តរជាតិ សំដៅលើកកម្ពស់សមត្ថភាពបំពេញការងាររបស់មន្ត្រីរាជការឱ្យមានប្រសិទ្ធ ភាពខ្ពស់ស្របតាមតួនាទី និងភារកិច្ចរបស់ខ្លួន។ ឯកឧត្ដមអគ្គនាយក បានមានប្រសាសន៍ថា៖ តាមរយៈការបណ្ដុះបណ្ដាលនេះ សិក្ខាកាមនឹងទទួលបាន បទពិសោធន៍គន្លឹះសំខាន់ៗផ្ទាល់ខ្លួនរបស់វាគ្មិន និងសិក្ខាកាម បែបបទ និងទម្រង់នៃការសរសេរលិខិតរដ្ឋ បាលជាភាសាអង់គ្លេសឱ្យបានត្រឹមត្រូវតាមបទដ្ឋាន ដើម្បីជាទស្សនទានក្នុងការអភិវឌ្ឍចំណេះដឹងរបស់ ខ្លួន ការរៀបចំផ្នត់គំនិត ការត្រៀមខ្លួនសម្រាប់ការផ្លាស់ប្តូរ និងការអភិវឌ្ឍវិជ្ជាជីវៈបន្ថែមទៀត ។ ជាមួយគ្នានោះផងដែរ ឯកឧត្ដមអគ្គនាយក បានក្រើនរំលឹកអង្គសិក្ខាកាមថា៖ ដើម្បីឱ្យការបណ្តុះ បណ្តាលនេះទទួលបាននូវផ្លែផ្កា អង្គសិក្ខាកាមត្រូវមានផ្នត់គំនិតវិជ្ជមាន ត្រូវធ្វើការដុះខាត់គំនិត ត្រូវចង់ ចេះចង់ដឹង រិះរកនីតិវិធីផ្លាស់ប្ដូររបៀបរបបធ្វើការងារ ដើម្បីពង្រឹងសមត្ថភាព និងចំណេះដឹងឱ្យកាន់តែទូលំ ទូលាយ សំដៅបង្កើនផលិតភាពការងារឱ្យកាន់តែល្អប្រសើរឡើង។ ជាទីបញ្ចប់ ឯកឧត្ដមអគ្គនាយក បានថ្លែងអំណរគុណយ៉ាងជ្រាលជ្រៅដល់វាគ្មិន និងសិក្ខាកាមទាំងអស់ ដែលបានចំណាយពេលវេលាដ៏មានតម្លៃចូលរួមក្នុងការបណ្ដុះបណ្ដាលនេះ និងបានផ្ដាំផ្ញើឱ្យសិក្ខាកាម ទាំងអស់ចូលរួមសួរដេញដោលឱ្យបានផុលផុសបំផុត ដើម្បីក្រេបយកចំណេះដឹងឱ្យបានច្រើន ហើយ យកចំណេះដឹងទាំងនោះទៅបម្រើជាតិមាតុភូមិ ដើម្បីអភិវឌ្ឍសេដ្ឋកិច្ចឱ្យឈានឡើងមួយកម្រិត ថែមទៀត៕